Reportajen Adroaldo “Saretukau”
Dosente UNTL, Mica Barreto klarifika ba públiku liu hosi diskusaun Fulan Naroman ba livru “Cina Timor” ne’ebé hakerek hosi autór Douglas Kammen no Jonathan Cheng, iha Fundasaun Haburas (14/07) katak la konkorda ho atribuisaun lia-fuan ‘Ching Chang’ ka ho Timor nia pronúnsia “Zin Zan”, tanba lia-fuan ne’e katak “Señor”, nune’e ita labele uza lia-fuan ne’e hodi diskrimina rasa ka ema Xina Timor sira mak hela kleur ona iha ita nia rai, tanba ne’e konotasaun negativu.
“Ha’u hanoin estereótipu ida ita bolu, temi ema Xina sira foin mai (Xina sira ne’ebé mai fa’an sasan hanesan One Dolar Shop, no seluk ne’ebé foin mak ba motivu servisu seluk) ita bolu Zin Zan, ha’u hanoin ne’e istila ladun di’ak, ita halo diskriminasaun ba ema nia rasa. Maibé atu hakarak hatene, lia-fuan ida Zin Zan ne’e loloos nia signifika ne’e Señor, Mister, ne’e bahasa Fujian, ema Timor uza tiha fali Ching Chang (Zin Zan – pronúnsia Timor), mais ita uza ne’e halo konotasaun ne’e negativu tiha fali,” esplika dosente Mica.
Mica akresenta, iha polítika Xina nian, governu Xinés konsidera Xina tasi-balu ka overseas ne’e kategoria ba rua ida sira bolu Huareng seluk mak Huachao. Huareng mak Xina desendente ho rai ne’ebé mak sira hela ba, hanesan Xina Timor konsidera hanesan Huareng Xina Timor. Iha mos Huareng Xina Indonézia, Singapore, Malaysi, Austrália no seluk. Huachao ne’e ema nasionalidade Xina.
“Wainhira ita temi identidade Xina Timor ne’e-ne’e, ha’u hanoin ita nia maluk Xina sira ne’ebé mak uluk halo migrasaun desde iha antes tempu kolonial, to’o iha 1975 i sira ne’ebé kontinua hela iha ne’e, ita identifika sira hanesan Xina Timor, sira seluk Xina tasi-balu,” dosente Mica esplika.
Iha fatin hanesan, komunidade Xina Timor, Katlin Gonçalves hatete, sira konsidera sira nia aan nu’udar Timoroan, tanba sira mos iha Uma-lisan, no nia avó feto rasik ema Timor. Nia mos hatete, sira hamahan aan iha Associação Comercial Comunidade Timor Oan (ACCCTO), hanesan organizasaun istóriku ida ne’ebé harii hosi Bei-ala sira iha tinan 1911, to’o ohin loron halo ona tinan 111 ba nia ezisténsia iha Timor.
“Ami nia servisu mak atu lori kontinuasaun saída de’it mak ita nia Bei-ala sira hela mai ita, ami ema Timor, hela iha Timor, sei iha Timor,” dehan Katlin Gonçalves relasiona ho kestaun balu konabá sé mak Xina Timor.
