Reportajen Umbelina dos Reis
Prezidente Komisaun A Parlamentu Nasionál, Joaquim do Santos apresia ho projetu rezolusaun aprova regulamentu, hodi fó prémiu ba sidadaun timoroan ho estranjeiru, ne’ebé defende liu ba liberdade imprensa
Tuir Prezidente Komisaun A, tratadu asuntu konstituisionais no justisa hateten katak prémiu ne’e naran Max Stahl, tanba nia konsidera Parlamentu Nasionál hasai rezolusaun ida iha fulan tolu kotuk ba, ne’ebé fó kompeténsia tomak ba komisaun A, atu elabora regulamentu ida, para Parlamentu bele aprova depois uza fó prémiu ba sidadaun timoroan ho estranjeiru, ne’ebé defende liberdade imprensa.
Nia dehan sidadaun ne’ebé defende liu ba direitu sidadaun nian, li-liu relasiona ho liberdade de imprensa, tanba ne’e mak Parlamentu hanoin ida ne’e importante tenke valoriza Max Stahl nia obra ba iha Timor durante períodu de rezisténsia, nia kontribui ba Timor-Leste hanesan jornalista, tanba ne’e mak Parlamentu hasai ona rezolusaun ida, rekoñese ninia partisipasaun no fo mandatu ba komisaun A, atu elabora regulamentu ida hodi kria regra atu atribui ba sidadaun ne’ebé mak premiadu
“Regra ita tau iha regulamentu ne’e kompeténsia ba komisaun A, atu nomea juri nain lima feto no mane bele kompoin. Tanba juri mak sei halo rekrutamentu ba sira, sei kria sira nia regra, depois kritériu ba kandidatu sira ne’e, ita tau iha prinsípiu sidadaun ne’ebé loyal ba sidadaun, ne’ebé defende nia koñesimentu, sientífiku, polítiku, istóriku, kona ba Timor, liu-liu liga ba liberdade imprensa”, dehan Joaquim ba jornalista sira iha uma fukun Parlamentu Nasional Segunda 25/07
Kada tinan prémiu ne’e sira fo iha loron 12 Novembru, iha situasaun rua iha ne’e Max Stahl nia kontribuisaun, ho sidadaun nasionál timoroan sira nian kontribuisaun.
Tuir planu Prémiu Max Stahl sei hahú iha tinan oin kada loron 12 Novembru iha loron Masakre Santa Cruz no nu’udar loron nasional juventude.