Home Notisia Fundu Rotativa RENETIL, Pedro Uza Ba Negósiu Promove Manu Lokál no Sustenta...

Fundu Rotativa RENETIL, Pedro Uza Ba Negósiu Promove Manu Lokál no Sustenta Alin nia Estudu

172
0
Pedro Faria Verdial "Dolar" ho ekipa RENETIL. [Foto: Adroaldo | 25.07.2022]

Reportajen Adroaldo “Saretukau”

Membru jerasaun foun Resistência Nacional dos Estudantes de Timor-Leste (RENETIL), Pedro Faria Verdial “Dolar”, hetan fundu rotativa Renetil hodi hala’o aktividade hakiak manu lokal iha Suku Watulari, Postu Administrativu Vemasse, Munisípiu Baukau.

Nia dehan “fundu ne’ebé ha’u hetan, atu foku liu ba manu lokal, hodi nune’e promove ita nia manu lokal ba oin, nune’e mos bele atinji ba merkadu ou tuir kliente sira nia nesesidade,” nia dehan, fundu ne’ebé nia hetan seidauk to’o fulan ida, maibé nia planu ona hodi hola hahan manu nian, halo konstrusaun manu-luhan.

“Benefísiu hosi fundus ne’ebé mak hetan, sei aumenta tan atividade ou hadi’a liutan aktividade ne’ebé mak ha’u halo tiha ona i nomos bele fo benefísiu ba alin sira hodi kontinua sira nia eskola nomos oinsá atu bele atende ba kliente sira nia nesesidade, liu-liu ba produsaun ne’ebé mak atu kontinua iha ne’e,” dehan membru RENETIL Pedro.

Aktividade ne’e halo ona desde 2017, hosi ne’ebá kontinua fa’an ona depende ba nesesidade kliente ne’e hanesan manu ou manu tolun, tuir saída mak kliente husu. “Rendimentu ne’ebé mak durante hetan, kada semana ida hetan $40, tuir produsaun manu ne’ebé mak hakiak,” Pedro dehan.

Nu’udar jerasaun RENETIL, nia husu atu kontinua nafatin fundu ne’e hodi apoiu joven no membru seluk bele hadi’a sira nia moris, maibé “oinsá parte RENETIL nian bele akumula jerasaun ne’ebé mak agora da-dauk komunga tiha ona doutrina RENETIL nian,” nia sujere.

Iha parte sorin, Primeiru Vise RENETIL, Francisco JMF Belo”Lires” hato’o, RENETIL hetan apoiu fundu hosi Serviço de Apoio à Sociedade Civíl e Auditório Social (SASCAS), nune’e RENETIL utiliza osan ne’e ba halo fundu rotativa RENETIL, hodi tulun nia membru sira hala’o sira nia atividade negósiu hodi sustenta sira nia família, ho nune’e mak RENETIL halo monitorizasaun fila-fali ba sira nia atividade.

“Atu mai haree besik liu atividade ekonómika, ita nia kompañeiru sira ne’ebé halo iha baze, tuir duni pedidu ne’ebé kompañeiru sira hatama ba iha RENETIL, tanba ne’e mak mai atu haree, atividade sira ne’e la’o ka lae, la’o duni tuir pedidu ne’ebé hatama ba ka lae, i oinsá ni-nia merkadu iha baze ne’e hetan duni lukru, tuir espetativa ne’ebé iha ka lae,” dehan Primeiru Vise RENETIL Francisco “Lires”.

Nia hatutan, vizita ne’e hala’o ba membru RENETIL sira ne’ebé hetan fundu rotativa hodi hala’o sira nia aktividade negósiu. Iha Suku Hera-Dili membru RENETIL ida nia atividade hakiak manu, iha postu Laclubar atividade alfaiataria, iha suku Watulari, Postu Vemasse-Baucau ba atividade hakiak manu mos no ikus iha Postu Administrativu Watucarbau-Viqueque ba atividade negósiu kioske.

“Espera katak atividade ida ne’e sei fo benefísiu ba ita nia kompañeiru sira hotu ne’ebé hetan ona iha faze primeiru no faze segundu ida ne’e,” dehan Lires.

Vizita monitorizasaun hala’o hosi Primeiru Vise RENETIL, Francisco JMF Belo “Lires” ho ekipa ba membru Renetil sira ne’ebé hetan apoiu fundu rotativa RENETIL ho montante osan $2000 ba sira nia atividade negósiu sira. Vizita ne’e hala’o durante loron tolu hahú iha loron 19-22 Jullu, 2022.

Print Friendly, PDF & Email

LEAVE A REPLY

Please enter your comment!
Please enter your name here