Reportajen Joanina Casamiro
Bee Timor-Leste Empreza Públika (BTL,ep), asina akordu ho kompañia manan nain CDFG Uni pesoál Lda no kompañia Mamatelu Tuniva Unipessoal Lda, hodi implementa projetu melloramentu sistema Bee Moos ba Postu Administrativu Ossu, Munisipiu Viqueque no projetu konstrusaun sistema Bee Moos iha Postu Administrativu Zumalai, Munisipiu Covalima.
Prezidente Bee Timor-Leste Empreza Públika (BTL,EP), Carlos Peloi dos Reis hateten asina akordu ho kompañia rua atu halo servisu melloramentu sistema Bee Moos, iha Postu Administrativu Ossu Munisipiu Viqueque nomós Postu Adiministrativu Zumalai, Munisipiu Covalima, projetu ida ne’e sei implementa durante fulan 6.
“Ita espera katak depois de fulan neen ita nia komunidade sira iha Iha Postu Administrativu Ossu Munisipiu Viqueque no Postu Adiministrativu Zumalai, Munisipiu Covalima, bele hetan Bee moos ho di’ak,” Dehan, Prezidente BTL,ep Carlos dos Reis hafoin asina kontratu iha Edifisu BTL,ep Kaikoli, Segunda 30/01.
Nune’e liga Bee moos ba iha fatin rua ne’e, benefisiu kuaze 1.000 mil ital uma kain iha fatin rua ne’e. Depois populasaun kuaze 7 mil ital hosi Zumalai nia 630 uma kain komunidade total 3.700 ital, iha Ossu iha benefisiariu 475 uma kain, populasaun kuaze 2.850 ital.
Nia haktuir, orsamentu ba projetu melloramentu sistema fornesimentu Bee Moos iha Postu Administrativu Ossu, Munisipiu Viqueque entre BTL,ep ho kompañia CDFG Unipessoal Lda, ho montante orsamento $421,903.57 no iha Postu Administrativu Zumalai Munisipiu Covalima konkursu entre BTL, ep ho kompañia Mamatelu Tuniva Unipessoal Lda, montante orsamento $ 419,349.04.
Iha parte hanesan Diretor kompañia Mamatelu Tuniva Unipesoal Lda Osvaldo Tavares, hateten, hanesan kompania mana’an na’in prontu atu bele ezekuta obra ida ne’e tuir tempu ne’ebe estabelese ona.
“Ami la espera karik iha fallansu ruma mak mosu relasiona ho ezekusaun obra liu-liu problema sosial, mais ami koko hodi nafatin buka meius oinsa atu iha koordenasaun ho Autoriedade lokal nian ho parte BTL,ep nian, hodi bele fo solusaun ba malu ne’ebe di’ak iha ezekusaun obra ne’e hotu tuir tempu ne’ebe termina ona,” esplika Osvaldo Tavares.
