Reportajen David da Costa Gusmao
Relasiona ho komunidade sira ne’ebé maka hatama proposta apoiu fundus iha Palásiu prezidensiál Ai tarak Laran Bairo Pite, atu hetan ajuda husi Prezidente da Republika (PR), Dr. Jose Ramos Horta, komunidade sira halo protesta ba funsionáriu sira ne’ebá, tanba balun la hetan resibu apoiu fundus.
Komunidade Isabel Tavares Araujo, husi suku Maskarina aldeia 04, dehan hatama proposta apoiu fundus iha palásiu Prezidente, semana rua ona la hetan resibu, maibe sira ne’ebé maka mai hatama iha loron ikus ne’e hetan hotu ona resibu apoiu fundus ne’e.
“Ami hatama semana rua ona, balun foin hatama semana ida balun foin hatama loron tolu ne’e, ohin loron hetan kedas naran, ami hatama uluk la hetan fali, ho ida ne’e ami husu para ami hetan ho resibu ne’e, se ami la hetan hotu-hotu labele hetan ajuda ne’e” hateten Isabel ba Jornalista sira iha palásiu Prezidensiál Aitarak Laran, Bairo Pite, Sexta 29/07.
Nia haktuir iha funsionariu palásiu prezidensiál sai mai hateten ba komunidade sira ne’ebé forma iha palásiu katak estadu maka atu fó han imi ka, Timor ne’e la hamalha ida.
“Mana ida sai mai koalia fali, imi hein estadu fó maka imi foin han hemu ka, imi Timor la hamlaha ida, nia fó fali liafuan hanesan ne’e, ida ne’e soke loos ba iha ami nia sentimentu,” haktuir nia
Ho ida ne’e, nia husu atu bele ajuda sira para hetan resibu husi palásiu Prezidensiál, tanba, proposta ne’e hatama ba iha ne’ebá ,ne’e mai ho individu laos grupu, atu hetan ka la hetan importante maka hetan resibu husi palásiu nian.
“Ami husu ba nain ulun sira, ajuda para hodi ami sira ne’ebé maka la hetan bilete ne’e, para bele hetan ami nia kartaun bilete, aban bainrua atu hetan ajuda ka la hetan importante maka ami hetan kartaun mutin ne’e husi palásiu prezidensiál iha ami nia liman laran,” nia husu.
Tuir observasaun jornalista Neon Metin iha terenu, iha komunidade barak maka forma iha palásiu Prezidensiál atu hetan resibu husi palásiu prezidensiál, maibe iha ne’ebá komunidade balun la hetan resibu, no sira halo protestu hasoru funsionariu iha palásiu Prezidensiál.
iha fatin hanesan Asesór Apoiu Sosiedade Sivíl, Quintilino Moniz Carvalho dehan balun simu ona resibu no balun seidauk simu resibu, tanba atende ema 6000 pesoal iha ne’e, ne’ebé mak seidauk simu mai fali hodi forma simu resibu.
“Ami komprende situasaun ne’e ita hasoru, balun simu ona resibu no balun seidauk simu, tanba buat hotu ita atende ema ne’e 6000 pesoal, ne’ebé labele hirus malu labele haksesuk malu, hau komprende ita boot sira mai simu resibu. Orsida loraik tuku 3:00, se maka seidauk simu resibu karik ita boot sira mai ita halo didi’ak no forma didi’ak hodi simu imi nia resibu,” nia esplika ba komunidade sira.
Hafoin rona tiha informasaun husi ekipa Prezidente da Republika, katak tuku 3:00 maka mai fali simu resibu, ho ida ne’e komunidade sira kontente rona informasaun ne’e tanba sira mós sei hetan resibu husi palásu Prezidensiál nian.