Reportajen Santina Lucia da Costa
Lesbian, Gay, Bisexual, Transgender, intersex, Gueer/Qestioning, Asexual (LBGTIQA+) selebra marsa ba diversidade, hodi hasa’e komunidade nia koñesimentu atu labele mosu tan diskriminasaun entre komunidade LGBTIQA+ ho sosiedade, tanba tempu naruk ona sira hetan diskriminasaun husi família no sosiedade. Sira la’os selvajen, iha fuan, iha sentimentu, sira mós iha direitu labele husik ema ida iha kotuk.
“Família sira sempre baku hau, dalaruma sona no ameasa atu oho hau, agora sira la baku ona, maibé sira duni hau sai husi uma, sira kesi hau iha kareta kotuk hodi dada iha Estrada, hau nia maun sempre baku hau dalaruma hau to’o dezmaia, hau senti kolen ona, ho hahalo’ok hirak ne’e, hau senti moe, no moras, maske agora hau halai husi uma, hau tauk hau nia familia sira hetan hau, hau seimpre muda fatin id aba fatin seluk.” Lian Komunidade LGBTIQA+.
Prezidente Komisaun Organizadór ba marsa diversidade, Natalino Guterres hateten, lian sira ne’ebé dala barak ita la rona, no lian sira ne’ebé ita rona finje lakohi atu rona, tanba lian sira ne’e mak ohin loron ita mai marsa, la’os tanba buat seluk, tanba ita mós ema, ita mos timoroan, iha fuan, no iha sentimentu, ita la’os salvajen, ita la’os sampah masyrakat ema barak hateten.
“Ami la’os selvajen, labele hamosu diskriminasaun entre ami ho sira, ami mós iha direitu labele husik ita iha kotuk ita hotu tenki iha oin.” Tenik Natalino Guterres iha Palasiu Prezidensial Nicolau Lobato, Bairu-Pite, 29/7.
Natalino dehan tempu to’o ona ita labele nonok hasoru diskriminasaun, tempu to’o ona ita fó liman ba malu, tane malu, simu malu, no respeita malu iha rai doben ida ne’e. Tempu to’o ona atu ita hotu haree ema hanesan ho ema hanesan Timoroan, hanesan maromak oan.
Prezidente Komisaun Organizadór, agradese ba Prezidente Republika, Dr. José Ramos Horta ne’ebé mak ho laran luak, simu sira mai selebra loron importante ida ne’e, ne’e la’os primeira vez akontese iha Timor-Leste maibé primeira vez akontese iha mundu tomak.
Entretantu atividade marsa diversidade hahú iha Sekretariu Estadu Juventude no Desportu (SEJD), Lecidere, to’o iha Palasiu Prezidensial Nicolau Lobato, Bairu-Pite, no hetan partisipa masimu husi komunidade LGBTQA+, Prezidente Republika, Ramos Horta, SEJD Abrão Nokosiku Saldanha, Ajensia Internasional, Sosiedade Sivil no komunidade sira