Reportajen Joanina Casemiro
Estudante Universidade Nasional Timor-Lorosa’e, Fakuldade Siensia Sosiais la simu politika Parlamentu Nasional atu sosa kareta Pajero Sport ba Deputadu nain 30, sira konsidera la justu.
Tuir Portavos Adozinho Salsinha Trindade hateten Politika Parlamentu Nasional atu sosa kareta sira hare ba iha situasaun ekonomia mundial no ekonomia rai laran ne’ebé la estavel.
” Ami nia preokupasaun ba públiku sira ligadu ho politika Parlamentu Nasional, horas ne’e daudaun planeia ona atu sosa kareta pajero Sport ba deputadu nain 30. Politika ida ne’e ami konsidera la justu no la iha moral, tanba hare ba iha situasaun ekonomia mundial no ekonomia rai laran ne’ebe la estavel , dezenvolvimentu iha rai laran hanesan Setör Saúde ne’ebé oras ne’e daudaun hasoru problema iha infrastrutura, ospitál nia kondisaun a’at , sentru Saúde no klinika dook liu husi komunidede nia hela fatin”, dehan Adozinho
Hare iha setór edukasaun kualidade infrastrutura ladun diak , eskola distansia dook, barak la iha mobiliarius ekipamentus , livru no seluktan. Setor infrastruktur Bee mós no sanitasaun ne’ebe oras ne’e daudaun la seguru no adekuadu ba povu , komunidade iha area rural no area remotas barak seidauk asesu eletrisidade , dalan no pontes barak seidauk diak, setor Agrikultura kualidade no kuantidade produsaun nasional menus , Irigasaun barak la funsiona no bee la iha .
Konaba Dezempregu kontinua aumenta ba bebeik, maibe deputadu sira uza sira nia autoridade foti desizaun atu sosa kareta , desizaun ida ne’e ameasa no hafraku ekonomia Timor – Leste nian ba futuru oin mai.
“Nune’e ami reafirma no deklara ba púbiku katak sosa kareta deputadu sira, ami deskorda total politika sosa kareta iha situasaun ida hanesan ne’e, desijaun la justu no inmoral kontra vontade povu nian”, dehan Portavoz iha Kampus UNTL, Kaikoli 11/10.
UNTL mos husu ba organizasaun sosiedade sivíl sira, atu ezije hodi hapara aktu hola kareta, tanba la refleta ba eroi no martires da patria 3000 mill resin, nia objetivu loloos atu liberta povu ida ne’e, laos atu liberta povu ho prado. Aktu deputadu nian kada períodu koalia deit Pajero, no la koalia sofrementu povu nian, no exploa povu nia osan hodi hariku sira nia an deit.
Sira mos husu ba Prezidente Republika ho nia kbiit tuir Konstituisaun, hodi veta Orsamentu ne’e, ho realoka fila fali ba setór sira ne’ebe importante.