Reportajen David da Costa Gusmao
Komemorasaun loron trajédia Balibo Five ba dala-47, ne’ebé mak komemora iha Suku Balibo Vila, Postu Administrativu Balibo no Munisipiu bobonaro, lori rendimentu di’ak ba komunidade sira ne’ebé halo negósiu ki’ik.
Patricia Herna Oliveira, nu’udar negosiante iha Balibo Vila hateten, komemora loron trajédia Balibo Five ne’e lori sorte boot, tanba iha ne’e loron baibain faan sasan sira ne’e la folin no ema mós la hola ida, maibe iha loron Balibo five ne’e ajuda tebes komunidade sira iha ne’e hodi bele faan sasan hodi hetan rendimentu.
“Komemora loron Balibo Five ne’e ami senti kontente tebes, tanba ami aproveita loron ida ne’e hodi bele hetan rendimentu, bainhira atu hetan rendimentu bazeia ba ita nia hahan, se ita nia hahan di’ak ita bele hetan rendimentu ne’ebé di’ak, mas bah au kontente tanba hetan rendimentu di’ak,” hateten Fatricia Herna Oliveira ba Neon Metin iha Balibo Vila, Sabadu 15/10.
Nia haktuir iha komemorasaun ne’e komunidade sira ida-idak lori sira nia produtu, no hahan sira mai hodi faan iha ne’e, depois mak vizitante sira ne’ebé mai partisipa iha komemorasaun ne’e hola.
“Iha ne’e ami faan tuir kbi’it ne’ebé mak ami iha, dader-san ami faan feiuk, talas, aifarina, dose, sasoro, no nia faar maka xá ho kafe, no meudia no kalan mak katupa, etu no erwe, naan manu no karu. Hau faan loron tolu iha ne’e ona, no hau hetan ona lukur 100 ital hanesan,” nia espresa
Iha fatin hanesan negosiante Delfina dos Santos hateten iha loron bailet faan sasan la folin ida, tanba ema laiha atu sosa, maibé iha loron komemorasaun ba Balibo Five ida ne’e, sente kontente iha oprtunidade hodi bele faan sasa tanba loron hanesan ne’e maka foin sasan sira iha folin.
“Loron-loron ne’e ami faan nasi bnkus de’it mas la folin ida tanba ema atu sosa ne’e laiha, maibé iha loron Balibo Five ida ne’e hau sente kontente, tanba ami iha oportunidade hodi bele faan ami nia etu no dose sira hodi hetan osan, maske hau foin mai faan loron ida deit mas hau fiar ema sei sosa, tanba tinan-tinan faan ema sempre sosa, ” nia espresa.
Tuir observasaun jornalista neon metin iha terenu nota katak, iha komemorsaun trajedia Balibo Five ne’e, negosiante sira iha Balibo sente kontente loos, hodi faan sira nia produtu sira tanba iha loron Balibo Five ne’e hanesan oportunidade ida ba sira hodi faan sira nia sasan hodi bele hetan rendimentu.