Reportajen David da Costa Gusmao
Komunidade iha suku Balibo Vila, postu Adminisrativu Balibo, Munisipiu Bobonaro kontinua halerik ba bee moos, maibe iha tinan ida ne’e Autoridade Postu Administrativu Balibo (APAB) ,Procopio Caero, garante katak komunidade sira sei hetan bee moos hotu.
Komunidade Balibo Patricia Herna Oliveira hateten ba Neon Metin dehan problema sira ne’ebé komunidade hasoru maka bee moos, tanba iha ne’e komunidade la’o dook foin hetan bee moos, sae tan komunidade sira iha ne’e lalain de’it bee. Maibé ba iha saúde iha ne’e laiha problema.
“Problema ne’ebé mak ami hasoru iha ne’e mak bee, tanba iha ne’e ami ba kuru bee la’o dook mak foin hetan bee, depois ami tun ba ne’e la’o tun de’it, mas bainhira sae fali mai ne’e ami sae rai lolon de’it ne’ebé ami senti kolen. Mas kona-ba saude ne’e ami di’ak ona,” Fatricia konfesa ba Neon MetiV iha Balibo vila, iha Sabado 15/10.
Nia haktuir ba ema sira ne’ebé iha osan, ne’e bee estavel hela, maibé ba komunidade sira ne’ebé osan laiha ne’e susar, maibé pasensia hodi ba kuru bee maske dook.
Ho ida ne’e nia husu ba governu sira, atu bele rezolve problema ne’ebé maka komunidade hasoru hanesan bee moos, liliu ba iha Bee Timor-Leste, Empreza Publiku, BETL,E.P labele iha tempu elisaun besik maka mai bosok tun sae komunidade sira hodi husu votus, depois la realiza sira nia fromesa ne’ebe hata’o mai komunidade sira.
Iha fatin hanesan Delfina Dos Santos haktuir iha Balibo Vila ne’e problema boot maka bee moos, tanba iha ne’e komunidade sira kuaze la’o oras ida maka foin kuru bee iha bee matan, maske iha ne’e bee torneira iha maibé iha tempu ida nia la mai ida.
“Ami husu ba governu atu haree mós problema sira ne’ebé ami hasoru, laos iha elisaun besik maka mai bosok ami komunidade, ikus fó tiha ami nia votus mas lakoi kumfri saida maka sira hateten mai ami, no liliu ba iha BETL,E.P atu bele haree ba problema sira ami hasoru, labele fula-fulan simu osan boot maibé ami komunidade sira iha foho kontinua halerik ba bee moos,” nia husu ba Governu.
Problema ne’ebé maka ami hasoru iha ne’e maka bee moos, iha ne’e bee torneira iha entaun di’ak, maibé la ami susar loos, entaun ami ba kuru bee matan de’it, no ami la’o oras 1 maka foin to’o iha bee matan, bainhira ami ba kuru bee mai fali sae de’it rai lolon,” nia dehan.
Ho ida ne’e nia husu ba governu, liuliu ba iha parte relevante sira a atu matan liu maka ba ih bee moos, tanba ema ne’e presiza liu maka bee.
Administradór Postu Administrativu Balibo, Procopio Caero rekoñese katak iha Balibo Vila ne’e mós iha limitasaun ba iha bee moos, tanba ho limitasaun ba iha bee moos ne’e maka atu fornese mai iha komunidade sira iha ne’e susar.
“Hau sente ami nian bee iha Balibo mós sai limitasaun ba kondisaun iha ne’e mós. Ho kondisaun no situasaun iha ne’e ho bee ne’ebé maka atu fornese mai iha ne’e limitadu,” nia rekoñese
Maibé atu alkansa ba komunidade sira atu asesu ba iha bee moos, parte Autoridade postu ne’e iha planu atu propoin ba iha governu liliu ba iha Bee Timor-Leste, Empreza Publiku, (BETL,E.P) atu haree ba iha problema bee ne’e. No iha tinan ida ne’e Autoridade Postu Balibo ne’e garante katak komunidade sira sei asesu bee moos hotu.
“Iha tinan ida ne’e hau garante komunidade sira asesu bee moos hotu, tanba ami halo ona prosesu ba iha fiskalizasaun ida ne’e nian, no ami halo ona planu ida hodi propoin ba iha BETL, E.P,” nia garante.
