Reportajen Joanina Casamiro
Prezidente Komite 12 de Novembru, Gregório Saldanha hateten rezolusaun juvinil la’os ho responsabilidade ba estadu ho nasaun, tanba valores ne’ebé importante iha rezisténsia nian, hodi hasoru forsa Indonesia maka tenke moris hamutuk no iha unidade ba malu.
“Ita koalia Kona-ba valores sira hahú iha rezisténsia hasoru forsa estranjeiru sira, valores rezisténsia saida mak sai hanesan valores, sasukat nia folin luta iha momentu ne’ebá, ita tenke moris hamutuk no iha unidade, ne’e valor ne’ebé importante tebes. Valor ida tan maka ema nia voluntarizmu, uluk ita la selu malu ne’e, voluntarizmu mesmu situasaun la hanesan, valor ida tan mak servisu ho kualidade, estuda maka’as ne’e môs valores, sira ne’e hotu kesi ita buat ida de’it mak domin,” Dehan Prezidente Komite 12 Novembru, Grigôrio Saldanha iha Salaun Laline-Larigutu CNE, Kuarta 9/11.
Nia hatutan kuandu ema iha domin ba malu, no domin ba rain doben ida ne’e, moris iha dame, paz, perdua no fo toleransia ba malu, atu ema bele la’o hamutuk no iha unidade. Tanba Valores rezisténsia nian tenke iha domin ba maluk no ba nia povu.
“Iha momentu ne’ebá se ita la hamutuk, oinsa ita bele manan funu, asuntu ida de’it mak importante, mak domin, se la iha hadomi malu sira la halo buat ida, tan ita hadomi malu, perdua malu, dame ba malu”, nia esplika.
Nia akresenta tan, ohin loron akontese joven sira baku malu, oho malu nafatin, ema tara a’an, joven sira mate iha sela laran, ema lori osan la tuir regras, valores ema la tuir ona ka la kumpre ona, sakrifísiu ne’ebé uluk as’wain sira no joven sira halo iha momentu ne’ebá ne’e.
“Tanba ne’e valores sira ne’e, ita tenke kaer metin nafatin atu bele atinji objetivu ida mak lori moris di’ak ba povu, liu hosi dalan Independensia atu hetan moris di’ak, tanba objetivu hotu luta iha mundu tomak ba moris di’ak, bele liuhosi intergrasaun, bele liuhosi Independensia, bele liuhosi moris paises rai seluk nian,” Tenik nia.
Iha fatin hanesan Prezidente Komisaun organizadór, Rogerio Castro da Cruz, haktuir iha tinan ida ne’e, komemorasaun masakre Santa Cruz 12 de Novembru 1992 ba Dala XXXI ho nia Tema maka ” Ka’er Metin Valores juventude Rezistensia nian hamutuk ita konstrui Nasaun ho esperansa ba Futuru”.
Atu komemora masakre santa crus iha mós Seminariu Nasionál ho objetivu, atu konsolida valores juventude rezistensia hodi hametin diak liu tan espíritu patriotizmu no nasionalizmu ba foinsa’e sira, hodi bele kontribui ba paz no estabilidade iha nasaun doben Timor-Leste.