Reportajen Umbelina dos Reis
Kongresu RENETIL nian ba da-8, Konsellu Sentral RENETIL nomos fundador Carlos da Silva “Saky” husu ba membru RENETIL sira ne’ebé kaer ukun haree ba povu vulnerável sira no ukun ho espíritu estadista no ho responsabilidade hodi tane povu sira hodi haree ba povu nia moris di’ak.
Iha diskursu, fundador ne’e hatete, dezempregu no pobreza ohin loron sai problema real. Joven barak mak sai husi nia rain rasik, hodi ba buka moris iha nasaun Portugal, dezafiu real ida ne’e ita hamutuk, RENETIL ho organizasaun rezisténsia sira seluk, sai kakutak ideal ho polítika hanesan 1975.
“Oinsá ita hamutuk ita bele rezolve problema sira ne’ebé mak ita nia nasaun hasoru, ita fiar ita bele, agora ita preparadu ona lori esperensia ukun, membru RENETIL lubuk ida okupa ona instituisaun estadu. Ita nia kompañeru balun ukun los ona, balun ukun seidauk di’ak, nune’e ita tenke ukun rekoñese ita sala,” dehan fundador Saky iha Kongressu RENETIL da-8, iha Centro Convenção de Dili, Sexta-feira, 11/12.
Nia hatutan, RENETIL la’os rezisténsia polítika de’it maibé RENETIL mos hanesan eskola polítika, eskola lideransa nian. Nu’udar fundador RENETIL ida reprezenta membru tomak hato’o ba ukun na’in sira balun ne’ebé ukun ona no balun ne’ebé sedauk ukun karik, ukun los, keta haluhan RENETIL liu-liu povu vulnerável sira.
“Husu ba kompañeru sira tenki ukun hanesan ema estadista ho responsabilidade, ukun ho matenek, ukun tuir lei, haku’ak timoroan hotu, hases halo diskriminativu ba povu, hases halo prejudika estadu no povu no tenki tane povu sai sentru ba polítiku, ba RENETIL prontu bainhira kompañeru sira presija,” dehan fundador Carlos “Saky”
Iha parte seluk, nia apresia mos ba Prezidenti Parlamentu Nasional, Aniceto Guteres ne’ebé kansela ona sosa kareta ba deputadu sira, nia mos espera bele halo mos revizaun ba lei pensaun vitalísia.
“Ita nia preokupasaun ida tan mak, kada tinan OJE dependente 100% ba mina no gas, i ita la kuidadu estraga gasta osan barak ita bele hasoru problema boot, bainhira laiha desizaun alternativa mina no gas la’os sai kolonial renovaveis governu sedauk investe OJE sériu iha setor produtivu, ita haree ba OJE 2023 osan ne’ebé tau ba setor produtivu sira hanesan edukasaun, agrikultura, saúde, turizmu, husu ba governu tenki investe OJE iha produtividade sira,” dehan fundador Saky
Nia dehan, ita presija indika presepsaun ho enerjia hodi tulun hametin estadu nia direitu no demokrátiku, hametin lei instituisaun estadu nian, nune’e ema hotu tenki moris tuir lei no regras, hametin estadu signifika dezemvolve planu estratéjika hodi kontinua ekonomia, kaer metin nafatin valor rezisténsia, tenki disiplina ho responsabilidade, determinasaun servisu politikasaun, tanki halo sakrifisiu nafatin tau interese públiku nian.
“Espera iha kongressu ida nee ita hili líder sira ne’ebé disiplina responsabilidade, determinasaun kualidade, integridade krítiku, koñesimentu kle’an ba asuntu estadu nian, ita la presija líder sivilista ka oportunista,” dehan Saky