Reportajen Joselina dos Santos
Organizasaun Resistensia Nasional dos Estudantes Timor-Leste (RENETIL), halo kooperasaun ho Diressão de Apoio Diagnóstico e Terapêutico husi Hospitál Nacionál Guido Valadares (HNGV), hodi hala’o doasaun ran ba Banco de Sangue HNGV atu fó solidariedade ba Timor-oan sira ne’ebe presiza ran urjente.
Sekretáriu Jerál Organizasaun Resistensia Nasional dos Estudantes Timor-Leste (RENETIL), Joaquim “Russuo” da Fonseca hateten atividade ohin ne’e hanesan atividade karidade ida ne’ebe RENETIL halo ho propozitu rua hanesan simbolikamente konvida povu Timor atu hahú tinan ne’e estende solidariedade ba malu atu bele ajuda ba mauk sira ne’ebe presiza ran no responde ba nesesidade Corpo de Sangue nian.
“Doasaun ran ne’e husi membru no jerasaun foun RENETIL nian, Joven Hadomi Natureza no Jeven ba Turizmu Religioso ne’ebe hakarak kontribui, maski organiza iha Sede RENETIL maibé nakloke ba sé deit mak hakarak kontribui bele mai. Horseik iha ema na’in 27 mak rejistu, maibé dadaun ne’e balun seidauk mai tanba sei iha oras servisu, mas to’o loraik sira sei mai hotu no aumenta tan”, Dehan Sekretariu Jeral RENETIL Joaquim “Russo” da Fonseca ba Neon Metin iha edifísiu RENETIL Farol, sesta 13/01.
Iha fatin hanesan, Membru jerasaun foun RENETIL Luis Garcia haktuir, Doasaun ran ne’e hanesan asaun solidariedade ida ba maluk sira ne’ebe daudaun ne’e presiza ran liu-liu kontinua oferese ran ba ospitál atu nune’e iha kualker momentu ne’ebe maluk sira presiza urjente bele fó ajuda.
“Husu ba Públiku liu-liu ba foinsa’e sira karik iha posibilidade bele ajuda ita nia maluk sira, tanba ran turuk ida bele ajuda no salva ema nia vida iha minutu balun, no mós nu’udar aktu ne’ebe la divia do ké gasta tempu ba monu ho motor, ran ne’ebe iha ita nia isin ho kondisaun diak entaun oferese ba, tanba Ita nia kontribuisaun ida ne’e bele ajuda ema rihun”, Nia informa
