Reportajen Umbelina dos Reis
Komité Popular organiza misa requiem iha Motael hodi fó solidária ba saudoza Shirley Shackleton ne’ebé hakotu nia iis iha loron Domingo 15 Janeiru 2023 iha Australia.
Iha misa ne’e Padre Juvito do Rego iha nia omilia hateten, matebian Shirley hakerek istória ida iha Timor, liu hosi nia kontribuisaun iha luta libertasaun Timor-Leste nian, iha tempu rezisténsia no kontinua iha tempu ukun rasik aan, ita só bele solidariza ho ultimo minutu liu de’it husi ita nia orasaun ba nia.
Padre Juvitu dehan, nia funu hasoru injustisa no nia la’en Saudozu Greg John Shackleton ne’ebe hetan oho husi military Indonesia iha Balibo, loron 16 Outubru 1975, sakrifika nia aan ba ita nia rai hahú iha okupasaun Indonézia.
Padre Juvito dehan vizaun atu aprende hamutuk ba aban bainrua mak justisa, direitu no presiza solidariedade.
Nia akresenta, solidariedade ba malu ne’e importante nu’udar natureza Timor nian, tanba Timor, povu ida ne’ebé solidáriu iha aspetu hotu.
“Rai Timor agora ita goza ne’e na’in ba solidariedade nian, se bainhira laiha sosiedade, se laiha solidariedade ne’e dehan monstru, moris hanesan ukun rasik-an presiza solidariedade ba malu, nune’e jerasaun hatene nafatin istória Timor. Sentimentu solidariedade ne’e mak ema hotu nia kolaborasaun, haksolok no justu ba rai ida ne’e” dehan Pe. Juvito iha misa requiem saudoza Shirley Shaklethon ne’ebé hala’o iha Igreja Motael, Kinta-feira, 19/01.
“Hanesan iha primeira leitura dehan katak ha’u hakerek ha’u nia naran iha besi riti boot ida, hanesan mos mana Shirley hakerek istória boot ida iha Timor. Mana Shirley nia la’en terus no lakon nia isin ba rai ida ne’e ka kesetian ba rai Timor, maibé nia espíritu nafatin hamutuk ho ita iha rai ne’e,” nia hatutan.
Nia hakotu hodi hato’o katak, solidariedade ne’ebé durante ne’e ita simu durante tinan 24 nia laran to’o agora, ita simu nafatin nune’e tenke saran aan ba malu iha sosiedade.