Reportajen Estajiada Agustinha Amaral
Ministériu Saúde (MS) lansa manuál foun ba Forsa Traballu Saúde iha Timor-Leste, nu’udar manual avaliasaun dezempeñu ba profisionál saúde, no nu’udar xave prinsipál ba jestaun rekursu umanu iha Ministériu Saúde.
“Ko’alia konabá rekursu umanus sai hanesan pillar importante ida ba Ministeriu Saude, hare ba problema durante ne’e saída mak akontese ka enfrenta hanesan ospitál sira, tanba ne’e mak ohin halo lansa manual foun sira, hodi haforsa traballu saúde nian iha Timor-Leste, hetan apoiu husi Estadus Unidus Amérika liu husi ajénsia ba dezenvolvimentu internasionál USAID,” hatete Ministra Saúde, Odete Maria Freitas Belo ba Jornalista sira iha Otel Timor, Kolmera, Kinta-feira, 19/01.
Nia hatutan, ita bele iha rekursu oi-oin, bele iha infraestrutura ne’ebé mak di’ak maibé kuandu rekursu umanu la preparadu, para bele halo jestaun ne’ebé mak di’ak en termu jere rekursu ne’ebé mak iha no mos ho entendimentu ho rekursu ne’ebé mak iha, entaun ida ne’e mak sai hanesan problema.
Maski ho rekursu ne’ebé natoon maibé Ministériu Saúde nafatin halo servisu ho kbiit tomak. Tanba ne’e iha parte seluk ko’alia konaba ema nia satisfasaun ne’e subjetivu tebes, ita koko atu halo di’ak, ema nunka satisfeitu maibé ami la haree ba ida ne’e no ami haree ba saída mak ami bele halo, dehan Ministra Saúde.
Nia dehan, haree ba estudu no esperiénsia nasaun seluk nian saída mak sira bele halo, oinsá atu jere ema no oinsá líder ida sa’e hodi motiva nia pessoal no atensaun ba pessoal sira.
Nia esplika jestaun rekursu umanu iha tanba ita servisu hamutuk ho Komisaun Funsaun Públika (KFP), felizmente ita mos iha baze legal seluk ne’ebe mak fo ba Ministeriu Saude atu halo jestaun ba iha rekursu umanu ka ba pessoal saúde ne’ebé mak profisionál, liu-liu ba médiku, infermeiru, parteira, tékniku aliadus ne’ebe mak liga diretamente ba pasiente sira.
Agora da-dauk ita utiliza hela rezime jeral hodi halo avaliasaun dezempeñu ba ita nia profisional saúde sira, maibé ho avaliasaun ida ne’e seidauk sufisiente ba ami para bele haree di-di’ak pesoal saúde nia dezempeñu ne’e oinsá.
“Ida ne’e la’os ami de’it maibé KFP mos fo sira nia opiniaun, atu hakle’an no jere liu tan ita nia pessoal saúde sira, ita espesífiku ona ba ita nia pessoal saúde sira ne’ebé mak goza hela rejime espesial, entaun ita iha sasukat ida ketak, para atu bele avalia sira nia dezempeñu espesífiku tuir sira nia kategoria ne’ebé mak iha,” tenik nia.
Iha sorin seluk, Prezidente KFP Faustino Cardoso haforsa KFP marka prezensa iha eventu ne’e, atu sai testemuña au mez tempu atu hatudu ba hotu-hotu katak ohin halo lansamentu, mai husi prosesu servisu hamutuk ida maka’as tebes, entre MS hamutuk ho KFP nune mos iha nivel MS, husi nasional to’o kedas munisípiu sira.
“Ho ida ne’e oinsá atu halo avaliasaun ba profisionál saúde sira no tempu instrumentu manual konabá avaliasaun dezempeñu ba profisionál saúde sira ne’ebé deskreve serbisu, no avaliasaun dezempeñu ne’e instrumentu xavi prinsipál ba jestaun rekursu umanu, ne’ebé inklui mos iha Ministériu Saúde ni-nian,” Prezidente KFP hakotu.
