Reportajen David da Costa
Partidu Demokrátiku (PD) no Partidu Kmanek Haburas Unidade Nasionál Timoroan (KHUNTO), hein desizaun husi Prezidente Republika, Dr. José Ramos-Horta, konaba data dekreta loron eleisaun Parlamentár 2023.
Sekretáriu Jerál Partidu Demokrátiku (PD) António da Concicão “Kalohan” hateten reuniaun ho Prezidente Repúblika, no oportunidade ba Partidu Demokrátiku mai fahe hanoin ba Xefe Estadu kona-ba preparasaun ba eleisaun parlamentár 2023, ne’ebé sei mai. Desizaun atu foti bainhira maka atu eleisaun, ne’e iha Xefe Estadu nia liman, no PD prontu tuir desizaun saida deit maka Xefe Estadu foti.
“Ami mós mai hanesan partidu ne’ebé moris halo tinan 22 no mai nafatin fó garantia ba Xefe Estadu dehan PD prontu nafatin atu hasoru eleisaun parlamentár 2023 hanesan mós 2018 liu ba. Tanba ne’e, desizaun iha Xefe Estadu nia liman atu aban ka bainrua ka semana oin ka fulan oin, PD hamriik tuir nafatin saida mak Xefe Estadu deside,” dehan
Ho ida ne’e, PD mai ho ninia estrutura nasionál, Prezidente Partidu hamutuk ho Prezidente CPN no Vise sira, mai hasoru Xefe Estadu hodi fó hanoin tetu ba situasaun sira ne’ebé oras ne’e daudauk la’o hela no kaer mós ba regra normál ne’ebé hatuur iha Konstituisaun RDTL.
Nia haktuir PD nafatin hein desizaun ne’ebé Prezidente Repúblika iha, no kaer metin nafatin ba prinsípiu sira iha Konstituisaun, katak governu ne’e iha kada tinan lima-lima nia laran no bainhira loos mak governu foun ne’e atu mosu liuhusi eleisaun parlamentár ida ne’e Xefe Estadu nia liman no Xefe Estadu mak sei deside.
Iha fatin hanesan, Konselleiru Partidu Kmanek Haburas Unidade Nasionál Timoroan (KHUNTO) José dos Santos Naimori Bucar, hateten ohin konvite husi Prezidente Repúblika hakarak rona partidu polítiku sira hotu-hotu nia hanoin, ohin Xefe Estadu husu opiniaun husi partidu sira kona-ba eleisaun parlamentár 2023, entaun partidu hotu-hotu bele hato’o nia hanoin tomak ba iha Xefe Estadu.
“Maibé ha’u sente katak Xefe Estadu hanoin di’ak liu tan ba buat hotu-hotu, ita rona husi Xefe Estadu, nia mak hili atu fó sai kalendáriu eleisaun parlamentar tanba Xefe Estadu rasik iha devér tomak bele dekreta,” nia dehan.