Reportajen Zevonia Vieira
Governu Estadu Unidu Amerika kontinua apoiu Timor-Leste liuhusi harii ligasaun sira iha rejiaun laran no liur.
Liuhusi meza redonda ne’ebe halo ho jornalista sira, Estadu Unidu Amérika nia Enkarregadu Negósiu, Tom Daley hateten Estadu Unidu Amerika, kontinua serbisu ho governu Timor-Leste, oinsa sai ponte hodi liga ba povu sira, hodi rezolve dezafiu hirak iha sékulu 21, nune’e governu EUA reforsa liután programa edukasaun, interkámbiu, no lideransa foin-sa’e nian, hodi dinamiza jerasaun tuir mai iha ita-nia nasaun rua ne’e.
Nia dehan dalan ida-ne’ebé halo daudaun ba objetivu ne’e, maka liuhusi asina ona primeiru memorandu entendimentu bilaterál, hodi hametin esforsu konjuntu, atu fó oportunidade ba akadémiku no estudante sira, atu partisipa ativamente iha edukasaun no interkámbiu internasionál sira.
“Hanesan parte ida husi ami-nia kompromisu inisiál, Estadus Unidus anunsia ona ami-nia kompromisu hodi finansia oportunidade bolsa-estudu foun sira hamutuk sia liuhusi ita-nia parseria”, dehan Tom Daley iha Embaixada EUA Dili, 09/02.
Nia hatutan Memorandu Entendimentu ne’e hatu’ur aliserse, hodi aumenta finansiamentu bilaterál ba edukasaun no oportunidade interkámbiu sira, liuliu ba estudante no akadémiku Timoroan sira atu kontinua sira-nia edukasaun superiór iha Estadus Unidus hodi, apoia Timor-Leste nia prioridade dezenvolvimentu kapitál umanu.