Reportajen Joanina Casamiro
Liuhusi konferensia imprensa, Estudante Finalista husi Universidade Nasionál Timor Lorosa’e (UNTL) ezije sira nia direitu graduasaun tinan 2023, sei laiha graduasaun sira konsidera universidade impede sira nia direitu atu tuir graduasaun. Tanba antes ne’e Vise Reitor fó sai Iha media katak estudante finalista UNTL 2022 sei gradua iha loron 24 Fevereiru 2023, maibé to’o ohin loron laiha informasaun husi Universidade.
Tuir Portavos Rui F.B.da Silva hateten, Universidade Nasional Timor-Lorosa’e (UNTL) , hanesan úniku universidade publiku iha Timor – Leste , iha ne’ebé kada tinan sempre produz rekursus humanus hodi kontribui ba prosesu dezenvolvimentu rekursu humanu iha Timor – Leste tuir planu no politika universidade nian maibé to’o agora finalista sira seidauk gradua.
Tanba ne’e estudante iha Fakuldade Siénsia Sosiál ezije sira nia direitu, tanba to’o ohin loron seidauk iha graduasaun ba estudante finalista sira iha Universitáriu Nasionál Timor-Lorosa’e (UNTL), se la iha solusaun sei mobiliza fakuldade 9 hodi halo asaun iha kampus Sentrál UNTL.
Nia haktuir bazeia ba planu no polítika universidade nian mak UNTL realiza graduasaun dalarua kada tinan maibé ba tinan 2022 nian UNTL la realiza graduasaun ba faze segundu sem razaun, no sei realiza fali iha 2023 maibé la iha Informasaun ruma.
“Nune’e iha loron Janeiru 2023 , Vise Reitór UNTL ba asuntu estudantil fo sai informasaun liu hosi media katak estudante finalista UNTL 2022 nian, sei gradua iha loron 24 Fevereiru de 2023, maibé ate ohin laiha informasaun, maibe seidauk iha serteza ba ami nia graduasaun . Asaun ne’ebé estrutura UNTL halo hodi hatarde ami nia graduasaun ne’e impede tebes ami estudante finalista sira, no hatudu hosi reitor la dun fó atensaun ba jestaun tanba universidade la tuir planu no politika ne’ebe iha ona,” dehan Porta Voz Rui, liuhusi Komunikadu Imprensa iha FCS-UNTL kaikoli, Kinta 23/02.
Nune’e mós sira husu ba Ministru Ensinu Superior Longuinhos dos Santos atu fó atensaun ba estrutura UNTL , espesifiku ba Reitor UNTL hodi desidi no realiza data fiksu ba graduasaun. husu mós ba estrutura UNTL atu imediatamente sai data fiksu ba graduasaun nomós data ba foti toga ba graduasaun nian tanba total Estudante Finalista graduasaun 1.370 hamutuk Fakuldade 9.
Iha fatin hanesan Estudante Finalista Natalia Pinto hosi Departmentu Adiministrasaun publiku, hateten hanesan estudante Finalista, mas seidauk gradua ne’e sai impaktu bo’ot ba estudante finalista tanba tinan agora ne’e vaga sai barak maibé la bele ba aplika tanba la iha diploma. Nune’e haree Universidade hanesan atu impende fali graduasaun ba finalista sira.
“Iha media katak loron 24 ami graduasaun ona, maibé realidade la iha Informasaun ruma hosi Universidade mai ami ba husu sira fó sala ba malu fali, ami mós ladun hatene los nia impaktu ne’e iha ne’ebé. Sei laiha gradusaun ne’e sai impaktu mai ami estudante sira. ami hakarak husu ami nia direitu tanba ida ne’e preokupasaun mai ami estudante sira ami nia hakarak ne’e lalais tuir regras ne’ebe iha ona Universidade atu nune’e, ami mós bele ba teste vaga sira ne’ebe fó sai ne’e tanba presiza ami nia Diploma,” nia dehan.