Reportajen Joselina Dos Santos
Iha Ambitu loron mundial feto nian, Idelta Maria Rodrigues hatete loron mundial feto nu’udar loron importante ba feto hotu-hotu iha mundu, inklui feto Timor-Leste, tan ne’e hahú halo advokasia atu ema hotu bele hatene, tanba sá tenke selebra loron importante no iha relasaun ho feto sira nia papél, oinsa no progresu dezafiu sira ne’ebé feto sira hasoru, liu-liu ba feto sira ne’ebé iha área urbana sira.
“Ha’u hanoin nu’udar feto Timor-Leste ita hotu presiza forsa ida, atu bele fortifika ba feto Timor-Leste ne’ebé di’ak ba ita nia rain, di’ak ba ema hotu no di’ak ba ema vulneravel, no mós di’ak ba ema ne’ebé hakarak hola parte nomós ba ema sira ne’ebé seidauk hatene, no di’ak ba povu tanba dala barak ema hanoin loron feto ne’e só feto de’it mak bele selebra maibé paz parte mós mane,” dehan Idelta Maria Rodrigues Iha Salaun QJ F-FDTL Fatuhada, kuarta 8/03.
Nia haktuir, nia haree ohin ne’e maioria feto de’it signifika atu fó vantajen no valoriza ba feto sira nia luta, maibé la ses husi ida ne’e tanba mane maluk sira mós presiza paz parte atu nune’e sira bele hatene feto sira nia knaar loloos, maske mane bele barak no di’ak maibé dalaruma feto nia knaar sira seidauk hatene, nune’e luta ba desiguladade jéneru ne’e luta ida ne’ebé laos husi jerasaun ida uluk, ka husi jerasaun kontinuadór sira tanba ne’e agradese bele selebra loron internasional feto Timor-Leste.
“Tempu to’o atu halo preparasaun ba ita nia nova jerasaun sira tuir mai ida ne’e importante tanba foinsa’e sira partisipa maximu tebes, espera katak foinsa’e sira sai mós ema ne’ebé promotora hodi promove igualdade jéneru iha uma laran ba sosiedade nomós ba nasaun liu-liu ba Universidade Nasional Timor-Lorosa’e (UNTL), nia programa Igualdade Jéneru fiar katak feto Akadémika UNTL sei sai fronline ba promove Igualdade jéneru hamutuk ho akadémiku sira seluk,” nia esplika.