Reportajen David da Costa Gusmao
“Sente orgullu tebes tanba primeira ves CNE mai hamutuk ho ami iha ne’e, mezmu komunidade izlámika minoria, mais CNE konsidera ami mós hola parte. Ami sente katak ami bele partisipa ho ami nia kondisaun, no oinsa maka ita kaer liman hamutuk iha prosesu demokrasia ida ne’e”. Haji Abdullah Said Sagran.
Komisaun Nasionál Eleisaun (CNE) vizita komunidade musulmanu, hodi koopera hamutuk hodi kria pás no estabilidade ne’ebe ema hotu hakarak, tanba CNE hanoin katak relijiaun hotu nia orasaun importante nune’e eleisaun bele lao ho diak
Ba jornalista sira Prezidente CNE, José Agostinho da Costa Belo hateten povu tomak hakarak antes eleisaun buat hotu lao ho diak, liu-liu kria paz no estabilidade, oinsa serbisu hamutuk lao deit iha nivel konsesus maibe inklui iha realidade moris
“Papel igreja, komunidade musulmanu no pendeta sira ne’e hotu, tanba uluk liu ita halo eleisaun sempre iha paktu unidade Nasionál, ita iha kultura, maibé ohin ne’e ita hanoin dehan presiza mós konsagra modernu uituan, katak reza ne’e mós importante, sira nia tulun no hakarak fó mós kontribuisaun, ” dehan Prezidente CNE iha Masjid Kampung Alor Dili, Kinta 9/03.
Nia haktuir prezensa iha ne’e reprezentante Musulmanu sira, no sei avizu ba komunidade musulmanu sira, no ko’alia mós komunidade sira ne’ebé iha ona idade 17 anos, atu bele partisipa iha esleisaun. Maski eleisaun ne’e la’os obrigatoriu maibé ita nia responsabilidade Timoroan importante tanba Timor ida de’it.
“Espiritu fraternidade foin lalais ita nia Parlamentu ka Governu sira asina ona, ida ne’e maka sai ita nia modelu, tanba ne’e maka CNE labele haree ba relijiaun ne’ebé maioria no minoria, maibé haree katak ema hotu nia kontribuisaun ki’ik ka boot, liuliu sira nia orasaun importante para sai tamanho no realidade,” nia esplika.
Nune’e Mós CNE nia esperansa eleisaun ne’e la’o di’ak, iha futuru governu ne’ebé mai bele aselera lalais ekonomia dezenvolvimentu sai espetativa boot.
Iha fatin hanesan Prezidente Conselho Curadór Fundasaun Masjid Annur, Haji Abdullah Said Sagran hateten maske komunidade izlámika minoria iha Timor-Leste, maibé CNE mós konsidera ona komunidade Musulmanu, ida ne’e orgullu boot ba iha komunidade Musulmanu sira, no bele sente no partisipa iha eleisaun ida ne’e, no oinsa maka bele kria paz no estabilidade iha eleisaun.
“Sente orgullu tebes tanba primeira ves CNE mai hamutuk ho ami iha ne’e, mezmu komunidade izlámika minoria, mais CNE konsidera ami mós hola parte. Ami sente katak ami bele partisipa ho ami nia kondisaun, no oinsa maka ita kaer liman hamutuk iha prosesu demokrasia ida ne’e, para ba oin ita bele fó valor ba nasaun Timor-Leste nian,” nia espresa.
Nia haktuir iha prosesu politika ne’e komunidade Musulmanu haree katak mosu konflitu, maibé Timor-Leste ne’e laiha konflitu entre komunidade relijiozu, tanba ida ne’e dezde uluk kedas komunidade izlámiku no espesiálmente Katolika, la’os husi baze de’it maibé komesa husi nain ulun no lider relijiozu sira iha ligasaun ne’ebé di’ak,
“Ami mós prontu atu kolabora, espera iha eleisaun 21 Maiu ne’e, eleitor sira nia partisipasaun ne’e bele aas liu tan,” tenik nia.
