Reportajen Joselina dos Santos
Autoridade Nasionál Petróleu no Minerais (ANPM), fasilita formasaun ba media nasionál sira, konabá setór petrolíferu no mineirais iha Timor-Leste, ho objetivu atu aumenta koñesimentu no kompriensaun jornalista nian, ba utilizasaun termu tékniku petróleu no minerais iha reportajen sira, nune’e bele ajuda públiku komprende setór ne’e hodi la kria konfuzaun iha públiku nia leet.
Ba formasaun ne’e, Prezidente ANPM, Florentino Soares Ferreira hateten objetivu husi programa ne’e atu fahe formasaun ba media sira relasiona ho indústria petróleu no minerais nia lala’ok, nune’e nia espera katak programa ne’e nia utilidade no benefísiu ba jornalista sira, iha sira nia reportajen.
“Ha’u fiar katak servisu hamutuk ho média sira ne’e dalan ne’ebé di’ak, maski ami hatene servisu jornalizmu ne’e la’os buat ne’ebe fasil tanba ezije média atu sai ema hotu nia lian, tanba jornalista relata informasaun ne’ebe luan tebes. Ho ida ne’e mak ANPM hanesan entidade estadu ida kontinua servisu ho jornalista sira hodi garantia katak sei fahe informasaun ne’ebe loos ba públiku”, dehan Prezidente ANPM liu hosi abertura Formasaun ba Jornalista sira iha Salaun Aeroportu Internasional Kay Rala Xanana Gusmão, Covalima, 22/03.
Prezidente ne’e relata, bazeia ba realidade ne’ebé iha, dala barak liu ema gosta krítika malu karik buat ruma laloos, maibé haluha katak ANPM mos iha papel importante hodi hadi’a sasan sira ne’e, nia dehan, ANPM la obriga jornalista tenke komprende maibé pelu menus eleva jornalista sira nia koñesimentu bainhira halo kobertura ruma konabá petróleu no minerais nia konteudu no lala’ok husi indústria ne’e rasik.
“Ita haree katak petróleu sai nafatin alvu iha diskusaun oin-oin, hanesan jornalista ami nia espetativa boot ba imi mak atu koñese setor ida ne’e tanba iha tempu naruk ita ladun koñese setor ne’e di’ak, entaun dala barak ema dehan setor ida ne’e tenke sai transparente katak setor ida ne’ebé labele konsentra ba ida rua ka grupu ida rua maibé setor ida ne’e estratéjiku, entaun povu iha direitu tomak atu hatene kualker desizaun, kualker asaun no rejultadu ne’ebé iha,” nia hato’o.
Iha parte seluk reprezenta Konsellu Imprensa (KI) Amito Qonusere Araújo hatete, KI kontinua apoiu ba formasaun sira ne’ebe entidades oin-oin fasilita ba jornalista sira atu eleva sira nia koñesimentu atu nune’e informasaun sira ne’ebé sira ba kobertura bele loos no konklui saída mak sira iha ba públiku.
“Ho vizibilidade plataforma dijital sei bele kompete ho media konvensional sira, tanba plataforma dijital barak liu mai ho identididade falsa ne’ebé lansa informasaun hoax, ikus mai públiku konsumu informasaun negativu”, dehan reprezenta KI Timor-Leste Amito Qunosere Araújo.
Durante iha Munisípiu Covalima, jornalista sira tuir formasaun loron rua (22-23) no vizita fatin aktividade perfurasaun mina no gas no aktividade mineirus nian inklui vizita postu kombustível rua iha munisípiu Covalima iha loron 24.