Reportajen Silvino Freitas
Bee Timor Leste empreza publika (BTL.ep), kontrata kompañia rua, hodi instala bee moos ba komunidade sira, iha villa Kelikai no Baguia, autoridade postu garante sei laiha impedimentu ba prosesu dada bee refere.
Prezidente BTL Carlos Peloi dos Reis hateten BTL asina tan kontratu ho kompañia rua, hodi hala’o servisu bee moos nian iha kapitál postu Baguia no Kelikai, depois ne’e tékniku sira sei halo koordenasaun tuun ba terenu hala’o servisu ho durasaun ba kontratu fulan 6.
“kompañia Nautetu ho join venture ida mak sei hala’o servisu ida ne’e, no osan ba projeitu ne’e maka ba Baguia 840.000 resin no Kelikai 518.000 resin” dehan Carlos iha edifísiu BTL Kaikoli, (04/04).
Nia dehan, bee ne’e sei dada ba iha kapitál post nian nune’e benefisiáriu sira maka iha Kelikai husi bee matan Uai-bitai’i benefísia ba suku Letemumo, Baguia, Lacoliu sira ne’e maka sei asesu tanba iha villa laran no iha Baguia husi bee matan Defawasi benefísia ba suku Alaua-Leten Alaua-Kraik no Haeconi.
Administrador Postu Kelikai Mateus Beremesak hateten, bee ne’ebé dada ba komunidade sira ne’e atu fasilita komunidade sira iha Kelikai villa, nune’e presiza koopera di’ak ho komunidade atu bele instala ho susesu.
“Projetu ida ne’e laiha ona interferénsia husi komunidade tantu bee nain, tanba sira iha ona konkordánsia no kombinasaun no sei hala’o tan kombinasaun ho komunidade ka bee-nain sira” dehan Mateus, (04/04).
Fatin hanesan nain ba kompaña Nautetu Maria Madalena dos Santos hateten, nia agradese ba BTL tanba fó ona konfiansa ba nia hanesan feto ida, liuhusi prosesu ne’ebé naruk atu dada bee husi area Uai-bitai’i nian, mai postu Kelikai villa atu fornese ba komunidade sira.
“Hau mós ema Kelikai oan tanba iha tempu naruk iha Kelikai postu saúde, postu PNTL orfanatu sira no eskola sira laiha bee moos, no komunidade enjeral bee laiha, nune iha tempu badak ha’u sei mobiliza materiál no sei responsabiliza ha’u nia servisu tuir tempu ne’ebé determinadu atu bele fornese bee ba komunidade sira” nia dehan.
Nia konklui katak, karik iha bee-nain iha area Uai-bitai’i mak hala’o impedimentu sira sei hamutuk hodi haree prosesu impedimentu refere, nu’udar kompañia sei koordena ho líder komunitária sira no sei halo mós komunikasaun ne’ebé di’ak ho komunidade sira atu rezolve hodi solusiona problema ne’ebé sei mosu, tanba bee ne’e importante ha’u sei uza maneira no linguajen ne’ebé di’ak hodi konvense inan aman sira.