Reportajen David da Costa
Primeiru Ministru (PM) Taur Matan Ruak, Husu ba bolseiru bolsa hakbi’it no bolsa parsiál sira atu aproveita másimu ba oportunidade ne’ebé maka hetan ne’e, tanba oportunidade ne’e mai dala ida no sei la mai dala rua, tanba ne’e labele lakon tempu hodi halimar Facebook no WhatsApp.
“Ha’u hakarak fó lian espesiál ba estudante sira aproveita masimu oportunidade mai dala ida, nunka mai dala rua, hanesan mos ita mate dala ida deit nunka mate dala rua, tanba ne’e aproveita másimu, Imi labele lakon imi nia tempu iha facebook, WhatsApp tanba ida ne’e la ajuda imi, nia kompleta buat ruma maibé nia la determina imi nian futuru,” dehan Primeiru Ministru, Taur bainhira partisipa iha serimónia Boas Vindas ba Bolseiru foun tinan akadémika 2023, iha CCD merkadu Lama, Tersa 4/04.
Nia hatutan tan, tempu ne’e osan mean tempu ne’e moris o lakon minutu ida nia liu ona o la rekoupera fila fali ona, tanba ne’e ba bolseiru sira favor ida aproveita tempu no konsentra ba iha imi nia edukasaun no formasaun.
“Kuandu ha’u ba vizita iha foho sira haree populasaun sira ne’ebé kbiit laek ha’u nian fuan rahun, tanba sa sira laiha oportunidade ne’ebé iha, entaun ha’u hanesan pesoalmente no PM agradese ba esforsu MESSK nian ne’ebé promove programa governu nia rua konaba bosla hakbi’it laekk no bolsa parsial, ita labele halo buat hotu, maibé estadu bele ajuda uitoan hodi hakmaan todan família sira,” esplika Taur.
Nune’e Xefe Governu ne’e, enkoraja bolseiru bolsa Hakbi’it no bolsa Parsiál sira katak tenke estuda dukur no mate iha livru. Tanba, aban bainrua jerasaun foun sira maka bele halo dezenvolvimentu ba iha Timor-Leste.
“Ami nia esperansa maka imi, imi maka aban bainrua kaer, dezenvolve lori ita nia nasaun ne’e ba oin, jerasaun sira troka malu kuandu ami nian tun, imi nian sae, responsabilidade ne’e todan loos. Ama ho apa sira iha foho, ha’u rasik no membru governu sira ne’ebé tau matan ba ita boot sira, ami hotu reza para imi hotu susesu,” nia esperansa ba bolseiru foun sira.
Reprezentante Bolseiru tinan Akademika 2023, Regina Aires, hateten, sente kontente tebes, tanba bele hetan oportunidade hodi hetan bolseiru ne’e, nunka imajina katak bele hetan oportunidade ida ne’e hodi bele kontinua estuda iha nivel ensinu superior.
Apoiu ida ne’e sira konsidera hanesan responsabilidade ida todan, ne’ebé governu operese ba sira, tan ne’e sira promete sei esforsu-an hodi estudu no finaliza sira nia estudu tuir tempu ne’ebé termina ona. Atu nune’e bele kontribui ba prosesu dezenvolvimentu bab iha rai doben Timor-Leste liuhusi area ne’ebé maka estudante ida-idak estuda.
“Ha’u nia inan aman mate hotu ona, bainhira ha’u remata eskola ensinu sekundariu ha’u, ha’u labele kontinua iha ensinu superior ho razaun laiha ema ida atu apoiu ha’u, maibé liuhusi bolsa hakbi’it mai ami oan kiak no povu kbiit laek nia oan sira mos bele hetan oprtunidade hodi bele asesu iha nivel ensinu superior“.
Hanesan ema hotu hatene rekursu umanu maka hanesan sai xave dezenvolvimentu ba mudansa Timor-Leste, Tanba ne’e sira mos husu ba uitavu governu, liuliu ba iha MESSK atu tau nafatin orsamentu ba programa bolsa hakbi’it atu nune’e maluk oan kiak no povu kbiit laek nia oan sira mos bele hetan oprtunidade hotu hanesan agora dadun iha future.
“Ha’u lori ha’u nia maluk bolsa hakbi’it no bolsa Parsiál husi Munsipiu 13 inklui RAEOA, agradese ba VIII governu ne’ebé maka oferese bolsa ida ne’e mai ami oan kiak no povu kbiit laekk nia oan sira,” nia Agradese.
Nune’e mos reprezentante inan aman, Virgina Nunes, liuhusi programa uitavu governu estudante sira ne’e bele hetan oportunidade hodi hetan bolsa estudu no bele kontinua iha nivel ensinu superior hanesan ho ema seluk ne’ebé maka iha kbiit.
“Tanba ne’e Ha’u hanesan bin no inan ida, ha’u ho ami hotu no familia benefisiáriu, kontente tebes tanba bele hetan oportunidade ida ne’e. ami agradese tebes ba politika VIII governu nian ne’ebé fó oportunidade atu halo balansu ba edukasaun katak edukasaun ba ema hotu,” nia kontente.
Nune’e familia nia esperansa katak liuhusi politika uitavu governu ida ne’e bele hasa’e kualidade edukasaun no aumenta rekursu umanu iha rai laran, liu-liu ba familia kbiit laek nia oan sir abele hetan formasaun ne’ebé aas hanesan mós ho familia sira seluk ne’ebé makai ha kbiit.
“Ami agradese tebes ba VIII governu, tanba liuhusi oportunidade ida ne’e, bele hakmhan ami nia halerik sira,” nia agradese.
Entertantu bolseiru ba iha bolsa hakbi’it no bolsa parsiál iha tinan akademika ne’e, hamutuk 1,683, husi totál bolseiru foun ne’e, mai husi Munisipiu 13 inklui Rejiaun Administrativu Espesiál Oe-cusse Ambeno (RAEOA).
