Reportajen Santina Lucia da Costa
Prezidente Republika Dr. Francisco Guterres Lú Olo halo enkontru ho Partidu Libertaҫão Popular (PLP), hodi rona opiniaun molok dekreta Eleisaun Prezidensial 2022, no Xefe Estadu husu PLP hanesan Partidus Politikus kontribui, tanba Timor sei iha periodu Covid-19, bainhira kampaña ema barak, Partidu Politiku nia papel mak koalia ba sidadaun sira prevene-an.
Hafoin enkontru Vise-Prezidente Komisaun Politika Nasional PLP, Francisco Vasconselhos, hateten tuir Konstituisaun Republika Artigu 86 pontu C katak, Prezidente Republika iha kompetensia dekreta data eleisaun, hahu kedas eleisaun prezidensial, Parlmentar iha 2023.
“Ita iha periodu eleisaun nian, eleisaun ba Prezidente Republika iha 2022, hanesan ohin ami koalia katak, tuir konstituisaun Republika Artigo 86 pontu C katak, PR iha kompetensia dekreta data eleisaun, hahu kedas eleisaun prezidensial, Parlmentar iha 2023. Iha 2022 ita prepara ba eleisaun prezidensial, tanba ne’e maka prezidente bolu PLP hanesan partidu politiku ida.” hateten, Vise-Prezidente Komisaun Politika Nasional PLP, Francisco Vasconselhos iha Palasiu Prezidensial Nicolau Lobato, Bairu-Pite, 6/01.
Francisco Vasconselhos, dehan konstituisaun define ona kompetensia exkluzivu Prezidente Republika, nune’e mós lei eleisaun Prezidensial define katak, antes 60 dias PR tenki dekreta ona.
“Opiniaun PLP nian, ita kumpri deit mandatu konstituisional eleisaun prezidensial ne’ebe guia ita katak, tenki hakruk tuir lei, labele liu loron 60, signifika hahu ona ohin, semana mai PR dekreta ona, depende PR dekreta data hira, mais dentru labele liu 60 dias.” hatutan, Francisco Vasconselhos.
Nia haktuir Prezidente Republika husu hanesan Partidu politika kontribui tanba ita sei iha periodu Covid-19, wainhira ita tama iha kampanha ita halibur ema barak, partidu politika nia papel maka koalia ba sidadaun sira uza maskara, hodi preven-an.
Kampaña eleitóral ho modelu saida de’it depende ba orgaun eleitóral define, maibe kontribuisaun hosi partidu politiku tanba sei iha situasaun Covid-19 ho variante foun Omicron ida ne’e sai hanesan Preokupasaun ba parte hothotu.
Nia hatutan, PR mós husu, kandidatu se de’it maka kandidata-an ita hotu apoiu, partidu politiku nia kontribuisaun ba estabilidade politika, prosesu tomak tenki la’o tuir regras sira ne’ebé lei eleisaun prezidensial.
Kona-ba PLP iha kadidatura ho kompete iha eleisaun Prezidensial tinan ne’e, Vise-Prezidente Komisaun Politika Nasional PLP, hateten, PLP seidauk hanoin atu kandidatura iha ka lae, tanba mekanizmu partidu nian ne’e sei iha enkontru alargada, konferensia sira mak sei disidi iha ka lae, se la iha mós se de’it mak ba, ita hotu ezerse ita nia direitu siviku hili lider ita nia nasaun tinan oin mai.
