Reportazen Zevonia Vieira
Estadu Emerjensia [EE] sei remata iha oras tuku 23.59 kalan iha loron 27 Abril dadersan no situasaun sei lao normal, karik limitasaun ba movitmentu mos sei remata. Ho situasaun ida ne’e Portavoz Centru Integardu Jestaun Krize [CIJK], Dr. Rui Araujo hateten iha observasaun rua deit katak orsida oras kalan 23.59 otl virus lao nafatin, “se ita hakarak buka virus entaun ita bok an ba. Dala idatan ba populasaun tomak ba virus laiha estadu de emerjensia, sirkulasaun virus lao nafatin”.
Hatan ba Media Tatoli tuir prespekti CIJK nian nesesita ka lae hodi estende tan Estadu Emerjensia? Dr. Rui Araujo hatan katak hosi prespektiva Jestaun de Krize iha nesesidades atu ita trava ema hosi liur labele tama lai, tanba fulan ikus nia laran ho desizaun ida suspende ema tama hosi fronteira ajuda teb-tebes Ministeriu Saude [MS] ho Ministeriu sira ne’ebe apoiu Ministeriu Saude nia esforsu, atu jere didiak kuarentena, hodi nune’e kazu sira ne’ebe ita detekta ne’e restritu ba fatin kuarentena ne’e fator positivu boot ida.
“Teknikamente prespektiva hosi Ministeriu Saude nian ho CIJK importante nafatin suspende lai ema hosi liur labele tama, MS ho Ministeriu Tekniku sira seluk liu hosi koordenasaun CIJK presiza tempu tan atu aumenta kapasidade para bele tes ema barak liutan no bele prepara fatin ba tratamentu liu-liu ba ema sira ne’ebe grave ho kritiku. To’o agora ita sedauk konsege halo buat barak iha area ida ne’e, hosi prespektiva teknika ida ne’ebe fo apoiu ba prosesu prevensaun no mitigasaun Covid-19, hanoin katak presiza tan tempu hodi hadia tan ida ne’e”, hateten Dr. Rui Araujo iha CCD, 26/04.
Dr. Rui hatutan ba estensaun Estadu Emerjensia ne’e desizaun politika no orgaun soberanu sira mak presiza hare, maibe teknikamente MS ho Ministeriu Tekniku sira seluk presiza espasu atu prepara didiak kondisaun, “tanba ema iha kuarentena reduzidu, fasilita ita atu identifika sekarik ema ruma positivu iha kuarentena nia laran. Ita nia difikuldade agora mak oinsa atu identifika se ema ruma positivu iha komunidade nia leet, tanba ne’e mak ita hahu hosi Liquisa ne’ebe mak centru saude sira hahu ona halo triajen”.
Iha parte sorin Komisaun Interministerial aprova ona atu extendetan Estadu Emerjensia ba fulan 1 nia laran no hein desizaun hosi Parlamentu Nasional hodi aprova, hodi entrega ba Prezidente da Republika hodi dekreta.
