Home Feature Covid-19, Albina Moris Hosi Hili Fatuk Hodi Faan, Ohin Loron Hola Susuben...

Covid-19, Albina Moris Hosi Hili Fatuk Hodi Faan, Ohin Loron Hola Susuben no Fos Ba Oan Mos Susar

507
0
Albina dos Santo hatutan moris hosi hili fatuk. [Foto: Jose Cardoso | 27.04.2020]

Reportazen Santina Lucia da Costa

Virus Corona kontinua sai inimigu ba ema hotu, tanba virus kontinua daet ba ema, maske iha Timor sedauk numeru ema mate, maibe virus ne’e halo ema tauk no preokupa.

Relasaun ho virus ne’e governu tenke foti desizaun hodi kria Estadu Emerjensia [EE] ne’ebe dekreta hosi Prezidente da Republika, hodi bele limita movimentu sidadaun nian, atu la daet virus hosi ema ida ba ema seluk.

Impaktu hosi EE nee rasik fo todan ba ema kbiit laek sira susar atu hatutan sira nia moris, balun susar atu hola hahan no akontese hamlaha.

Ida ne’e mak akontese ba Albina dos Santos, idade 32 nia oan iha nain haat, feto rua no mane rua. Antes EE Albina ho nia oan sira loron-loron ba hili fatik mutin kiik, tauk hamutuk hodi faan, dala ruma folin no dala ruma la folin.

“Ami hili fatuk mutin kiik, ami naran hili de’it karik ema hola, antes estadu emerjensia seidauk dekreta kada vez ema hola no la hola, satan agora estadu emerjensia ona, ema nunka atu mai hola, hili fatuk loron ida saku nakonu rua ka tolu no fa’an saku ida $1.00 no hatun ba $0.50 sen. Hau nia katuas mos serbisu suru rai henek, butuk ida $15.00 dollar, mais kada vez ema la tula”, tenik Albina dos Santos ba Neon Metin iha Fomentu II, 25/4.

Estadu Emerjensia nia laran susar boot liu ba Albina ho nia familia hasoru, hahan netik mos laiha, nesesidade bazika laiha.

“Agora dadaun estadu emerjensia hanesan ne’e hahan laiha, ami araska teb-tebes, nesesidade bazika laiha, ami atu foti osan iha ne’ebe mak hola hahan sira ne’e, maibe ami ba foti fali subriña sira nia osan mak hola fali foos mak han”, konfesa Albina ho laran triste

Feto maluk ne’e husu ba governu, atu bele tau matan netik ba sira ne’ebe moris kbiit laiha, tulun sira liu hosi fo hahan netik ba sira.

“Ami loron kalan mak suru rai henek, agora estadu emerjensia hanesan ne’e ema la mai hola, ami atu foti osan iha ne’ebe mak atu sustenta uma laran, satan agora dadaun labarik sira mesak kiikoan hotu, osan laiha atu hola susu been”, tenik Albina ho esperansa boot

Albina nia oan feto idade 8 agora dadauk no mane idade 10 iha eskola primaria, nia oan idade 6 no mane tinan 4 sedauk eskola. Albina ho nia kaben haknaar sira nia an hanesan suru rai henek no hili fatuk, hodi hakmaan netik sira nia susar, maibe bainhira mak sira bele hakat liu susar ne’e, se EE sei kontinu estende?

Tuir Observasaun Neon Metin, ema kbiit laek kontinua serbisu suru rai henek no hili fatuk, maske iha situasan EE no ema la ba hola, maibe sira kontinua esforsu suru rai henek no hili fatuk.

LEAVE A REPLY

Please enter your comment!
Please enter your name here