Reportajen David da Costa
Governu liuhusi reuniaun ordinária Konsellu Ministrus (KM) aprova projetu Proposta Lei ne’ebé aprezenta husi Ministériu Finansas, Rui Augusto Gomes, kona-ba Planu Grande Opsaun ba tinan 2024.
Porta Voz Governu, Ministru Prezidénsia Konsellu Ministru Fidélis Mangalhães, hateten, Lei Grande Opsaun Planu nian ba tinan 2024 mak kompostu husi medida plirianuál no anuál ne’ebé atu identifika estratéjia orsamentál no prinsipál opsaun iha planeamentu ho impaktu iha Orsamentu Jerál Estadu ba tinan orsamentál tuirmai no ba tinan haat tutuir-malu.
“Lei Grande Opsaun Planu permite ligasaun direta ida entre prosesu planeamentu nian no prosesu orsamentál, ne’ebé permite atu konkretiza planeamentu orsamentasaun tuir programa sira,” dehan Porta Voz Governu, Ministru Prezidénsia Konsellu Ministru Fidélis Mangalhães, iha Palásiu Governu, Kuarta 5/04.
Nia hatutan, Proposta Lei Grande Opsaun Planu nian oras ne’e aprezenta tamba realizasaun eleisaun parlamentár iha loron 21 fulan-maiu tinan 2023, atu nune’e bele vigora bainhira Governu foun nomeadu no bele prepara lalais Orsamentu Jerál Estadu.
Maibé, aprovasaun Lei Grande Opsaun Planu nian la impede Governu foun atu aprezenta, hamutuk proposta ho proposta Lei Orsamentu Jerál Estadu, nia proposta Lei Grande Opsaun Planu nian rasik, tuir nu. 7 art. 47 Lei nu. 2/2022, husi loron 10 fulan-fevereiru (Lei Enkuadramentu Orsamentál).
Tanba iha Valór despeza globál Setór Públiku Administrativu iha Orsamentu Jerál Estadu ba tinan 2024 mak define dolar amerikanu billaun 1,7. Adisiona despeza Rejiaun Administrativu Espesiál Oekuse Ambeno (millaun 81,1) no Seguransa Sosiál (millaun 291,9) halo totál despeza globál konsolidada sai dolar amerikanu billaun 2,07.
