Reportajen Filomena da Conceição
Presidente Partidu Centro Acção sosial Demokrata Timorense (CASDT), Isaac do Rosário hateten setór justisa iha Timor-Leste durante ne’e la’o ladun di’ak, tanba ne’e presiza intervensaun imediata atu halakon korrente Injusitisa, hodi dignifika ema hotu nia direitu hanesan hodi asesu ba Justisa.
“Jerasaun foun sei hamriik fila fali hatuur unidade ne’ebé hanesan ba Justisa iha rai Timor-Leste ba oin, Justisa tenkiser la’o ho di’ak atu nune’e ema hotu bele kumpri buat hotu iha Timor-Leste atu bele banati-tuir sira ne’e hotu, solidaridade tenkiser ita hotu-hotu tau solidariu ne’ebé mak a’as ba buat hotu la’o ho di’ak” dehan Isaac iha abertura mini kanpaña, kampu Futsal Taibesi, ne’ebé Neon Metin asesu husi Live Streaming RTTL Kuarta 19/04.
Nume’e sekretáriu jerál Partidu CASDT Galy Araújo, hatutan, partidu CASDT hanesan Partidu alternativu atu kore povu husi kiak no Mukit tanba ne’e, CASDT sei préoritiza dezenvolve setór agrikultura núne’e bele garante sustentabilidade ekonomia nasaun nian no reduz produtu importadu sira.
“Ita hotu hantene katak setór agrikula importante maibé importasaun maka’as, mina foin dadun folin sa’e, masin midar folin sa’e, ita problema tanba salário mínimu no atu hola foos mós ita importa hotu, maibé ita nia foos iha rai laran mós iha, tanba ne’e ita tenke kuda para ita uma laran mak han, hodi halakon mal nutrição, tanba ne’e CASDT ninia programa maka oinsá ita atu hakbiit ita nia setór Privadu Nasional prosesu hakbiit ita nia ekonomia nasional”, dehan Gally
CASDT rasik prioritza iha setor justisa, hodi reforsa orgaun Judisial tanba justisa maka alizerse ba diretu no liberdade povu nian. Alénde ne’e CASDT hakarak diversifika no modernizasaun setór agrikula kapasitasaun no tekniku ba povu agrikultór sira atu bele mellora produtividade servisu hodi hasa’e produtu iha rai laran no reduz produto importadu sira.
Tanba ne’e atu realiza promesa hirak ne’e, Partidu CASDT husu ba Povu iha Munisípiu Dili atu fó vota konfiansa ba partidu CASDT hodi manan iha eleisaun Parlamentár.