Reportajen Filomena da Conceição
Abertura Kampaña eleitorál Partidu União Democrática Timorense (UDT) liuhusi konferensia imprensa, hato’o sira nia manifesto polítika ne’ebe foka liu ba asegura direitu povu nian, hodi asesu ba agrikultura, saúde no edukasaun.
Primeiro Vise presidente, Partidu União Democrática Timorense (UDT) João Pereira, hateten, Bainhira povu fó fiar ba UDT hodi manan iha elisaun Parlamentar maka UDT sei Asegura Direitu Povu hodi asesu Ba grikultura, Saúde no Edukasaun.
Alénde ne’e sei desentraliza administrasaun sei lori dezenvolvimentu no hakbesik liu tan ba povu, núne’e ema hotu bele asesu prosesu dezenvolvimentu ne’ebé la’o iha rai-laran.
“Programa espesífiku ne’ebé UDT hakarak lori ba kampaña maka UDT hakarak promove bainhira UDT kaer ukun iha governu oin mai, maka iha objetivu prinsipàl Rua: Primeiru, UDT hakarak asegura direitu moris Povu Timor-Leste nian, hodi asessu oportunidade Saúde, Agrikultura, edukasaun no setór sira seluk ba asisténsia sosiàl. Segundu, UDT hakarak asegura katak direitu povu iha ne’ebé ké merese duni atu simu, atu hetan asisténsia mak tenke simu.“Dehan Primeiro Vise Prezidente UDT João, bainhira halo Konferensia imprensa, iha faról Díli, ne’ebé Neon Metin asesu husi Live streaming, Kuarta, 19/04.
