Reportajen Silvino Freitas
Misaun observasaun eleitorál husi organizasaun Comunidade dos Paises de Lingua Portuguesa (CPLP) ne’ebé observa prosesu eleisaun parlamentár kongratula estadu Timor Leste tanba realiza eleisaun ne’ebé di’ak tebes tuir prosedimentu eleitorá ne’ebé estabelese ona.
Embaixadór Republica Angola Jose Marcos Barrica hateten, sira fahe ba ekipa 5 iha munisipiu Dili ekipa 2 no ekipa ida ba kada munisipiu sira hanesan Baucau Ermera no Aileu hodi hala’o observasaun ba sentru votasaun hamutuk 76 ho eleitór hamutuk 143.775 kuaze 16%, enkuantu iha munisipiu Dili Likisa no Manatuto sira estebelese kolaborasaun ida ho ekipa observadór sira husi nasaun G7+ ne’ebé observa sentru votasaun 81 ho eleitór hamutuk 88.223 ho eleitór besik 10%.
“Ami kongratula votante sira, CNE, STAE no seguransa sira ne’ebé ho servisu profisionál no responsabilidade ne’ebé realiza prosesu votasaun la’o ho di’ak ema hotu ba tuir votasaun iha paz no hakmatek nia laran” dehan Jose Marcos Barrica liuhusi konferénsia imprensa iha otél Novo-Turismo dili, (23/05).
Nia dehan tan, iha prosesu observasaun ne’e sira identifika sentru votasaun ne’ebé asesivél no fasil ba eleitór sira, materiál ho kondisaun ne’ebé adekuadu ba funsionamentu hotu no kumpri mós ba prosedimentu votasaun nian hahú husi abertura to’o enseramentu votasaun no prosesu kontejen votu, nune’e sira kongratula autoridade sira RDTL nian ne’ebé realiza eleisaun parlamentár ho livre no transparente ho prosesu ne’ebé kredivel tebes hodi permite partisipasaun ampla sidadaun sira nian iha prosesu politika nasaun nian, liuhusi ezerse direitu vota nian iha respeito ba igualidade sufrajiu no universál ho Liberdade espresaun asosiasaun.
“Ami nia observasaun la hetan buat ida prosesu votasaun buat hotu la’o ho di’ak tuir prosesdimentu sira ne’ebé iha, maskí iha krimi eleitorál balun maibé sei prosesa tuir lei ne’ebé vigora” nia dehan.
Nia konklui katak, povu Timor Leste forma ezemplu di’ak ezerse direitu votu hodi reforsa demokrasia iha estadu direitu nasaun nian, kria koesaun ne’ebé di’ak iha komunidade CPLP nian.