Reportajen Joselina Dos Santos
Komisaun Nasional Eleisaun (CNE), husu ba públiku atu la bele paniku no la bele hanoin ho resultadu sira ne’ebe fó sai hosi media no hosi parte instituisaun sira tanba ida ne’e seidauk formál maibé tuir Lei Konstituisaun CNE mak sei fó sai rezultadu provizóriu inklui kadeira ne’ebe distribui, nune’e CNE sei halo verifikasaun ba akta orijinal sira ne’ebe mai hosi sentru votasaun durante 72 horas hafoin fó sai rezultadu.
Hafoin abertura, Prezidente CNE Jóse Agustinho Belo hatete, tuir lei katak depois apuramentu STAE halo iha munisipiu hotu-hotu ba akta orijinal ne’e, entaun akta sira ne’ebe hosi sentru votasaun mai hotu iha CNE atu kontinua fali halo apuramentu durante 72 horas nia laran.
“Ita verifika fila fali akta orijinal sira, keta numeru balun laloos tuir prosesu karik verifika kuaze sistema foun la uza sistema ne’ebe mak fó ona. Ida ne’e atu ita haree diak katak iha direitu duni ba vota ka lae nia resultadu ne’e konfirma duni ka lae tanba servisu tomak kuidadu atu nune’e votu ida direitu ne’e ba sé, ida ne’e mak ita halo”, dehan, Prezidente CNE Jóse Agustinho Belo iha Salaun Apuramentu CNE Kolmera, kuarta 23/05.
CNE husu ba publiku la bele paniku no la bele hanoin ho resultadu sira ne’ebe fó sai hosi media hosi parte instituisaun sira halo tanba sira ajuda fó sai mais ida ne’e laos formal, maibé tuir Konstituisaun CNE mak sei fó sai rezultadu provizóriu inklui kadeira ne’ebe distribui, Ida nee hotu sei fó tempu 48 horas ba partidu sira hodi halo estalasaun ruma.
“Mais karik durante ida ne’e laiha ita direitamente submete ba Tribunal Rekursu atu halo validasaun tuir prosesu, nune’e husu ba sira kontajen iha idak-idak nian tuir partidu sira halo, maibé formal ne’e nafatin CNE mak fó sai rezultadu”, nia informa.