Reportajen Silvino Freitas
Partido Demokratiku (PD) apresia ho konfiánsa ne’ebé povu fo liuhusi eleisaun, nune’e sei uza konfiánsa refere hodi dignifika povu no nasaun nomós hein lejitimidade ba rezultadu votasaun no partido maioria mak sei hala’o dialogu.
Prezidente PD Mariano Sabino Asanami hateten, PD apresia ho votu ne’ebé povu fó konfiansa ne’ebé povu fó sei uza ho didi’ak atu bele servi inan aman ho di’ak no rai ho di’ak, ho votus ne’ebé ki’ik nune’e sei la realiza hotu kompromisu hotu maibé sei esforsu hodi atinji komprimisu lubuk ida bele atinje.
“Ita hotu kampaña atu hamenus dezempregu iha ita nia rain ita hotu kampaña oinsá dignifika joven sira iha rai laran nomós sira ne’ebé servisu iha rai liur, ita kampaña para nasaun ne’e sai estratejiku iha rajiaun ida ne’e” dehan Asanami liuhusi konferénsia imprensa iha sede PD Colmera, (24/05).
Nia dehan, PD fi’ar katak bainhira hala’o koligasaun sei diskuti klean kona-ba plataforma programa nune’e bele servi povu di’ak liu bele aselera dezenvolvimento nomós kurizi tinan 24 ukun an hahú husi 1999 to’o 2023, kuriji mós buat ne’ebé la di’ak no kontinua ida ne’ebé di’ak no buat ne’ebé ladi’ak husik hela ba kotuk ho nune’e PD konsiente katak ema hotu hamutuk mak tuir eleisaun nune’e vitória ne’ebé iha ne’e povu nian.
“Ita tenke dedika vitória ne’e ba moris di’ak povu nian” dehan Asanami.
Nia konklui katak, PD partido ne’ebé nakloke hodi hala’o komunikasaun ho partido hotu nune’e hein lejitimidade ba rezultadu votasaun husi tribunal, partido sira ne’ebé maioria mak bele buka dialogu ba partido sira seluk, nune’e PD nafatin hakmatek ho respeita ba prosesu eleitorál tomak hodi hein lejetimo rezultadu eleisaun husi tribunal rekursu.
Entretantu tuir rezultadu finál provizoria ne’ebé halo ona kontajen husi STAE, PD hetan votus hamutuk 64493 ho 9,32% hafoin FRETILIN ho 25,75% no CNRT ho 41,62%.