Reportajen David da Costa
Governu liuhusi reuniaun Konsellu Ministrus (KM) delibera ona autoriza, Ministru Obras Públikas (MOP) atu modernizasaun sistema públiku abastesimentu bee no saneamentu ba munisipiu tolu maka hanesan Munisipiu Lospalos, Viqueque no Manufahi.
“Konsellu Ministrus delibera ona autoriza, tuir projetu ne’ebé aprezenta husi MOP, despeza hodi hahú prosesu aprovizionamentu no formalizasaun tuir kontratu públiku ezekusaun obra nian modernizasaun sistema abastesimentu bee no saneamentu iha sidade Lospalos, Viqueque no Same,” dehan Porta Voz Governu, Fidélis Leite Mangalhães, iha Palásiu Governu, Kuarta 31/05.
Nia hatutan, tanba ne’e, Konsellu Ministrus autoriza despeza globál estimada dolar amerikanu millaun 66,83 ba prosedimentu aprovizionamentu ne’ebé sei halo iha lote tolu, hodi Modernizasaun sistema públiku abastesimentu bee no saneamentu.
“Iha lote primeiru odernizasaun sistema públiku abastesimentu bee no saneamentu ba sidade Lospalos ho valor estimadu dolar amerikanu millaun 22,48; lote segundu, modernizasaun sistema públiku abastesimentu bee no saneamentu ba sidade Vikeke ho valor estimadu dolar amerikanu millaun 23,76; no lote terseiru, modernizasaun sistema públiku abastesimentu bee no saneamentu ba sidade Same ho valor estimadu dolar amerikanu millaun 20,59,” nia esplika.
Nune’e mós, ohin Konsellu Ministru delibera ona autoriza mós tuir projetu ne’ebé aprezenta husi Ministru Obras Públikas, despeza ba kontratasaun Konsultoria ida iha Jestaun Projetu nian ba Projetu Abastesimentu Bee no Saneamentu iha Dili (Dili Oeste), ho valor estimadu dolar amerikanu millaun 15,2.
Enkuantu Prota Voz Governu ne’e dehan, osan empresta mós mai husi OJE no fim Timor-Leste maka selu nafatin, tanba ne’e evita linguajen ida dehan ne’e laos osan estadu nian, ne’e osan empresta nian, osan empresta mos estadu nian hotu. Ne’e estadu Timor-Leste lejislasaun nian, jerasaun aban bainrua nia destinu maka hadianta hela halo dezenvolvimentu para bele fó retornu ba investimentu iha tempu oin mai.
“Hau hanoin empresta mós mai husi OJE no ita tenke selu nafatin, laiha empresta ida gratis iha rai ida ne’e. Parseiru dezenviolvimentu sira mós kuandu bá ko’alia iha fati-fatin sira nia apoiu ne’e sira mós ko’alia loloos, tanba ne’e empresta no fim Timor-Leste maka selu, tanba ne’e tenke jere ho diak no emprestu sira ne’ebé Timor fati no ita nia garante katak emprestu sira ne’e iha restorunu ba investimentu sira,” nia esplika.