Reportajen David da Costa
Porta Voz husi Klibur Estudante Suku Coliate-Leotelo, Berta de Jesus, dehan sira lamenta tebes ho promesa ne’ebe mak Ekipa EDTL, E.P, husi Munisipiu Ermera liuhusi Sosializa Programa Eletrifikasaun Komunitária iha Suku Coliate-Leotelo Postu Administrativu Hatulia A, Munisipiu Ermera iha loron 16 fulan Março tinan 2023, hamutuk ho autoridade suku no komunidade sira halo ona konkordánsia katak sei halo instalasaun ba liña eletrisidade iha tempu badak ba iha Aldeia Aihatadiu, Hauhei no Manucate iha Suku Coliate-Leotelo, maibé realidade komunidade hein to’o ohin loron la akontese tuir promesa ne’ebe ekipa husik hela ba komunidade sira iha suku Coliate-Leotelo ne’e
“Hare’e ba promesa mamuk ne’ebe mak ekipa Eletrisidade de Timor-Leste Empreza Públika (EDTL, E.P) Munisipiu Ermera nian husik hela ba komunidade sira laiha rezultadu pozitivu mak ami husi Klibur Estudante Coliate-Leotelo sai hanesan liman ain ba komunidade Preokupa tebtebes ba problema ne’ebe komunidade hasoru, ho nune’e ami husi Klibur Estudante Coliate-Leotelo nafatin firme hodi luta ba dezenvolvimentu baziku iha baze, no ami husu ba ekipa EDTL, E.P, Munisipiu Ermera atu hatan ba ami nia preokupasaun ne’e no sekarik iha problema ruma bele resposta no klarifika detallu ba ami nia preokupasaun ne’e iha publiku atu nune’e ami bele hatene kona-ba fallansu ne’ebe mak EDTL, E.P, Munisipiu Ermera hasoru,” Porta Voz Klibur Estudante Suku Coliate-Leotel Eremera dehan liuhusi Komferensia Imprensa, iha Jardin 5 de maiu kolmera, Sabadu 17/06.
Tanba iha Suku Coliate-Leotelo iha Aldeia 7, no Aldeia 4, hanesan Aldeia Manulete, Teuro, Raegoa no Klaetrema mak asesu ona ba liña eletrisidade, no Aldeia 3, hanesan Aldeia Aihatadiu, Hauhei no Manucate, seidauk asesu ba liña eletrisidade. Ho ida ne’e, haree ba preokupasaun no problema hirak ne’ebe komunidade Aldeia 3 hasoru Ka infrenta, sira se ezije ba iha autoridade atu relevante hodi bele haree ba iha prekupasaun komunidade nian ne’e.
“Ami husi Klibur Estudante Suku Koliate-Leoteo (KESCL) nafatin ezije ba Autoridade Suku Coliate-Leotelo ho nia estrutura no parte revante sira atu buka dalan hodi bele responde ba problema ne’ebe maka komunidade infrenta hela liu-liu ba liña eletrisidade,” sira Ezije.
Ho nune’e mós sira nafatin apela ba parte relevante ne’ebe maka halo ona sosializa ba programa Eletrifikasaun Komunitaria iha Suku Coliate-Leotelo atu bele foti komunidade nia problema ne’e sai hanesan situasaun emerjensia ida hodi instala Eletrisidade iha tempu badak tuir promesa ne’ebe ekipa EDTL, E.P Munisipiu Ermera husik hela ba komunidade aldeia tolu ne’e.EDTL, E.P liuhusi komisaun Exekutiva Departamentu Planeamentu Sistema Eletrikus foti ona dadus Suku Coliate-Leotelo liu-liu Aldeia Tolu ne’ebe seidauk asesu ba eletrisidade iha ona lista planu levantamentu Eletrifikasaun (aldeias) no mensiona aldeia tolu ne’ebe seidauk asesu ba liña eletrisidade iha ne’eba, maibe to’o ohin loron komunidade la rona rezultadu ka issu ruma husi sira no ida ne’e signifika katak aldeia tolu ne’e mos sei asesu ba eletrisidade iha tempu badak.
“Ami lakohi atu hela de’it ho promesa mamuk sira, maibé ami hakarak dezenvolvimentu ida ne’ebé realistiku atu nune’e komunidade bele senti no bele senti mudansa ba dezenvolvimentu iha Timor-Leste,” sira kontinua kritika.
Enkuantu sira mós hato’o rekomendasaun ba autoridade Suku Coliate-Leotelo Abel Maia da Costa ho nia estrutura atu toma responsabilidade ba problema ne’ebe m komunidade infrenta. No sira mós nafatin rekomenda ba kandidatu Xefi suku Foun karik asumi kargu labele repete tan erru hirak ne’ebe iha, maibé buka dalan hodi hadia moris komunidade sira nian.
“Ami hakarak rekomenda ba Ekipa Eletrisidade de Timor-Leste Empreza Públika husi Nasional atu kopera hamutuk ho Ekipa EDTL, E.P Munisipiu Ermera hodi responde ba ami komunidade Suku Coliate-Leotelo liu-liu ba aldeia tolu ne’ebe maka temi iha leten. No Rekomenda mos ba MOP bele tau mos interese ba komunidade nia problema eletrisidade ne’ebe mak komunidade Suku Coliate-Leotelo hasoru liu-liu Aldeia tolu hasoru, tanba problema ne’e ami konsidera hanesan situasaun emerjensia ida ba ami. Ikus liu ami Klibur Estudante Suku Coliate-Leotelo firme no alerta nafatin ba parte relevante hotu-hotu atu hatan ka resposta ba ami nia preokupasaun hirak ne’e iha Kurtu prazu ka tempu ba badak nia laran,” sira rekomenda.