Reportajen Joselina dos Santos
Selebrasaun Misa Aniversáriu ba Organizasaun Resistência Nasional dos Estudantes Timor-Leste (RENETIL), ba dala 35, Padre Juvito do Rego, husu ba RENETIL tenke servisu makaas ho ezekutivu, hodi kontinua luta ba libertasaun povu nian liu-liu ba direitus umanus no justisa sosial atu bele transforma sosiedade ida ne’e diak iha futuru.
Iha omilia hodi komemora loron aniversáriu RENETIL, Padre selebrante Parókia Santo António Motael Juvito do Rego, hateten, RENETIL presiza esforsu hodi tau matan ba sosiedade Kbi’it laek sira, tanba ne’e ema ne’ebé fuan lamoos la intimidade atu hola parte iha RENETIL, atu nune’e bele fó Kbi’it ba ema vulneravel sira atu kontinua moris hodi bele servisu ba sira-aan.
“RENETIL tenke hamriik firme hodi servisu makaas atu bele halo mudansa ba rai doben Timor, tanba ita nia sosiedade ne’e ida ne’e, sosiedade ne’ebé mais fragmental ne’ebé sempre diskriminasaun ba malu entaun presiza servisu makaas maske kiik no krekas”, dehan Padre Selebrante Juvito do Rego, bainhira preside misa aniversáriu RENETIL bad ala-35, iha Parókia Santo António Motael, tersa 20/06.
Tanba RENETIL servisu povu kuda no estadu sosa tanba povu mak sai osan atu estadu bele dezenvolve, nune’e presiza servisu hodi transforma sosiedade ida ne’e ho seriedade. Tanba RENETIL hanesan komunidade ida ne’ebé lori povu nia lian, entaun liuhosi Renetil mak bele halo mudansa no tenta halo rahun relasaun sosiedade ne’ebé namkari lemorai.
“RENETILmai ho hanoin sistema mentalidade husi instituisaun nasional no internasional sira, atu haburas ita nia identidade no ita nia karakter sira atu bele transforma sosiedade ida ne’e, tuir estudantes RENETIL nia istória hodi denunsia krime hotu-hotu ne’ebé Indonezia halo hasoru Timoroan sira, nune’e mós neutraliza propaganda falsu sira ne’ebé Indonezia halo ba forum internasional sira katak povu Timor-Leste simu ona integrasaun,” nia esplika.