Reportajen Silvino Freitas
Pensaun mensál vitalísia reduz ona ba 60%, hodi hasai ona nune’e haree mós vontade partido polítika atu bele hapara, hodi muda ba seguránsa sosiál, nune’e mós polítika lelaun prado sei haree karreta balun iha kinta lejislatura nian kondisaun tanba ne’e presiza haree karreta balun kondisaun ladi’ak ona no presiza lelaun duni.
Prezidente eleitu ba Parlamentu Nasionál Maria Fernanda Lay hateten, lei pensaun vitalísia ne’e altera ona, hodi hasai previlejiu lubuk ida ba mandatu ida hetan de’it 60%, tanba ne’e maka la’ós lei pensaun vitalísia ne’e mantein, tanba vontade polítika husi partido polítika sira hotu bele sosa, nune’e bele hapara pensaun vitalísia, atu hotu hotu bele tama ba iha seguránsa sosiál nian.
“Sei iha prioridade barak atu servi povu, ekonomia tenke la’o kampu servisu ami tenke servisu hamutuk, pensaun vitalísia bele hamoos laiha buat ida” dehan Fernanda Lay iha PN hafoin eleitu ba PPN, (22/06).
Nune’e ligadu ho lelaun prado, nia dehan tan, tuir lei parlamentu presiza fiskaliza maibé atu ba fiskaliza ne’e presiza karreta maibé naran karreta ne’ebé bele fasilita ba fiskalizasaun no laiha inrerese atu hala’o lelaun ba karreta hirak ne’e, nune’e mós karreta ne’ebé uza ba tinan 10 ne’e kondisaun at ona no hadi’a mós presiza osan barak, no halo fiskalizasaun ne’e la’ós iha munisípiu maibé to’o iha foho tutun sira, labele ariska deputadu sira nia vida no seguránsa hodi halo fiskalizasaun.
“Deputadu atu ba fiskaliza ne’e tenke uza meius para ba ne’ebá, karik dehan lalika fó karreta sa’e kuda ba ami di’ak hela maibé idade hanesan ami nian atu sae kuda ba iha foho leten ne’e susar” nia dehan.
Nia konklui katak, utilizasaun karreta ne’e la’ós inkluzivu tanba membru governu sira mós sa’e karreta maibé konforme ba markasaun, karik dehan lalika fó karreta aluga de’it karun liu, atu aluga, nune’e mós iha terseira lejislatura ne’ebé la releitu sira lori tiha, maibé dadaun ne’e nia éspera katak bele fó fila hodi haree ida ne’ebé at ona ne’e bele hola fali, tanba karreta pajero-sport ba kuarta lejislatura ne’e sei iha kondisaun ne’ebé di’ak nune’e sira laiha interese atu halo lelaun.