Reportajen David da Costa
Ministeriu Públiku (MP), notifika jornalista husi Hatutan.com, Rogerio Pereira Carceres, hodi presta deklarasaun ba iha MP, liga ho produtu jornalista nian ne’ebé maka jronalista hakerek kona-ba Prokuradór Jeral Republika (PGR) nian viajen ba iha rai liur.
Jornalista Hatutan.com Rogerio Pereira Carceres, ne’ebé maka akompaña husi nia Xefe Redasaun, Francisco Belo Simões, to’o iha edifisiu PGR Kolmera, Dili, iha tuku 9:45 Otl, no liu kedas ba iha resepsionista nian hodi fó hateten kona-ba nia prezensa iha edifisiu PGR.
Hafoin presta deklarasaun durante oras ida liu, jornalista Hatutan.com, Rogerio Pereira Carceres, hateten, iha Tersa-Feira loron 20 Juñu 2023 mais ou menus tuku 3:00 loraik, Media Hatutan.com simu notifikasaun husi Ministru Publiku (MP), no iha konteudu notifikasaun ne’e komparénsia, sira husu atu Jornalista ho Naran Rogerio Pereira Carcers, atu mai iha loron 22 Juñu, tuku 10:00 otl mai presta deklarasaun iha Ministru Publiku.
Tanba ne’e hanesan jornalista no sidadaun ida, ohin mai kumpre hela notifiksaun husi PM, hodi halo presta deklarasaun ba iha prokuradó Ministru Publiku nian, liga ho Prokuradór Geral Republika (PGR) nian viajen ba iha rai liur.
“Hanesan jornalista Hatutan.com no hanesan mós sidadaun ida, ha’u kumpre ba notifikasaun ida ne’e, ohin ha’u mai konsegue presta deklarasaun ba iha prokuradór sira iha Ministru Publiku. Hau hanoin kolega sira mós akompaña no hatene liuliu ligadu ho publikasaun balun kona-ba prokuradór nian ba iha rai liur, ida ne’e maka sira notifika. Hau sente buat seluk ne’e segredu justisa, hau labele pronunsia ba kolega sira,” dehan jornalista Hatutan.com Rogerio Pereira Carcers, ba jornalista sira iha edifisiu PGR kolmera Dili, Kinta 22/06.
Iha fatin hanesan, Xefe Redasaun Hatutan.com Francisco Belo Simões, haktuir se iha notifiksaun ne’e, kona-ba konteúdu ka publikasaun iha media Hatutan.com nian, relativamente ho dokumentus balun, iha lei komunikasaun sosial klaru ona katak, responsabilidade másimu ba produtu jornalistiku nian ne’ebé publika iha media sira ne’e, responsabilidade juridiku ne’e Xefe Redasaun la’os jornalista sira.
“Ha’u husu ba orgaun soberanu, bai ta nia ukun nain sira, ba povu no entidade hotu-hotu, ne’ebé sente ofendidu ho publiksaun notisia ruma husi media sira, buat ruma la loos iha notisia, bele uza direitu de resposta no retifikasaun iha lei komunikasaun sosial. Tanba ita nia lei komunikasaun sosial mós hateten katak responsabilidade krime produtu jornalistiku iha orgaun komunikasaun sosial mak Xefe Redasaun,” esplika Xefe redasaun Hatutan.com