Reportajen David da Costa
Iha 11 Juñu 2023, media online Diligente publika notisia investigativu kona ba kondisaun Seminariu Menor Nossa Senhora de Fátima (SENOFA). Iha notisia ne’e Diligente hatete katak eis-seminarita balun denunsia tratamentu ladiak no agresaun mak akontese iha Seminariu Menor. Maibe SENOFA, ohin (22/06), rejeita informasaun mak publika hosi Diligente no hato’o rejeisaun liu hosi Konferensia Imprensa.
Retor Seminariu Menor SENOFA, Pe. Natalino da Costa Soares hatete katak Diligente publika notisia falsu, difama no estraga reputasaun instituisaun nian.
“Ami rejeita kategorikamente denúnsia sira ne’ebé Média Online Diligente fó sai ne’e, iha ne’ebé ami considera falsu, ho konteúdo difamatóriu, ne’ebé atinge diretamente dignidade no direitos ema sira ne’ebé envolvidu, no kompromete onra no reputasaun institucional Semináriu Menor Balide nian”, Retor Seminariu Menor SENOFA, Pe. Natalino da Costa Soares hatete iha Konferensia Imprensa, iha Seminariu SENOFA, Balide, ohin.
Pe. Natalino da Costa Soares mos hatete katak la’os primeira vez mak Diligente publica akusasaun falsu no bosok oioin hasoru Igreja iha Timor-Leste. Iha semana balun liu ba, Média Online ne’e publika artigo ida hodi hateten katak Igreja, Nomeadamente Conferência Episcopal Timorense (CET), la apresenta kontas gastos sira nian ligadu ho subvensaun públika ne’ebé Governu fó ba CET tuir Artigo 11° Konkordata ne’ebé RDTL assina ho Santa Sé iha fulan agosto tinan 2015.
Retor ne’e mos dehan katak Diligente hakarak halo deit sensasi no la iha fundamentu. Nia mos dehan tuir loloos Seminariu hetan oportunidade atu hatene konteúdu akusasaun sira ne’e ho prazu mínimu 24 horas atu bele responde ba akusasaun sira ne’e, situasaun ne’ebé Diligente falha tiha atu respeita.
Diligente diskorda ho saida mak Retor Seminariu Menor SENOFA, Pe. Natalino da Costa Soares hatete no insiste katak Diligente nia publikasaun notisia bazeia ba faktu hosi fontes ne’ebe loos. Diligente mos halo esforsu atu hetan informasaun hosi Retor Seminariu Menor SENOFA, Pe. Natalino da Costa Soares hatete maibe la hetan resposta.
“Informasaun ne’ebé jornalista Diligente hetan ne’e husi fontes ne’ebé loos no ko’alia kona-ba faktus ne’ebé maka akontese duni iha Semináriu Menor Nossa Senhora de Fátima (SENOFA), maske hetan ona faktu ona, Maibé Media Diligente haruka karta ba iha Retór SENOFA iha 27 Marsu 2023, atu entervista nia iha 28 Marsu, maibé laiha resposta. Ho ida ne’e, iha dia 1 juñu Jornalista Diligente koko atu halo komfirmasaun Reitór ne’e liuhusi viatelfone, maibé Reitór ne’e rejeita atu fó informasaun, tanba ne’e maka iha dia 11 juña, Media Diligente publika informasaun refere”, Diretór Media Diligente, Eduardo Soares hato’o ninia diskonkordansia ho konteudu konferensia imprensa hosi Seminariu Menor SENOFA nian, iha nia edisiu Bidau, ohin (22/06).
Nia mos haktuir, informasaun ne’ebé maka Media Diligente Publika ne’e, iha fontes nain tolu, la halo sensasionalismu maibe aprezenta produtu jornalistiku. Notisia ne’ebe publika laos mai husi opiniaun jornalista mas mai husi faktu ne’ebé jornalista hetan.
Kona ba notisia seluk ida ne’ebe Retor Seminariu Menor refere ba Conferência Episcopal Timorense (CET) nia relatorio, Diretór Media Diligente Eduardo Soares rekoinese maibe halo ona komunikasaun ho nunsiu kona ba notisia ne’e. Relatoriu ne’ebe temi iha notisia ida ne’e Diligente haree ona no hein hela kopia elektronika depois publika nudar direitu de resposta.
Diligente kontinua defende publikasaun bazeia ba faktu no Retor Seminariu Menor SENOFA hatete katak sei entrega ba Advogado Arquidiocese nian, ho parceria ho Gabinete Jurídico hodi hadiak hikas nia honra no reputasaun institucional.
