Reportajen Agustina
Asosiasaun Difisiente Timor-Leste (ADTL) hala’o diskusaun ohin (27/06) foku liu ba iha setor intrevensaun no prevensaun. Atu halo oinsa mak bele bele asegura intervensaun sira ba ema ho difisensia, no saida mak ita bele halo hodi halo prevensaun sira, atu asegura labele aumenta ema ho difisensia.
Diretor Ezekutivu ADTL, Cezario da Silva hato’o kona ba intervensaun no prevensaun hosi linha ministeriu sira tuir planu estratezika ADTL nian ba iha tinan 8 nia laran.
“Funsionariu difisensia nia diskusaun ohin, ami foku liu ba iha setor intrevensaun no prevensaun oinsa mak ita bele halo atu bele asegura intervensaun sira ba ema ho difisensia, no saida mak ita bele halo hodi halo prevensaun sira, atu asegura labele aumenta ema ho difisensia”, hateten direitor ezekutivu ADTL ba jornalista iha salaun Timor Plaza, Orchid Room, tersa, 27/06.
Iha fatin hanesan membru ADTL, José Frederico de Souza informa katak nia kontente tebes ho programa ADTL no bele mai partisipa iha eventu ne’e durante loron rua.
“ADTL nafatin hala’o parseria ho organizasaun hotu-hotu, atu nune’e bele tau Matan ba ema ho difisiente iha Timor-Leste, tanba dala barak ema sempre halo diskriminasaun ba ema ho difisiente sira,” Jose Frederico dehan.
Jose Frederico husu mos ba EHD iha Timor laran tomak labele lakon ho oportunidade ho dezafiu ne’ebe hasatan, tanba EHD tenki esforsu makas hodi halakon dazafiu ne’ebe hasatan hela ita ne’ebe ho difisiente.
Entretantu Sekretaria Protesaun Sosial no igualdade jeneru Felicity Erdington dehan, programa inkluzaun ba difisiente prioridade importante tebes ba australia iha programa dezevolvimento iha timor-leste, Tanba ne’e kontinua servisu nu’udar parseiro save DFAT nian no sei kontinua ajuda ADTL ba inisiativa dezevolvimento kapasidade ba membro ADTL sira.
“Ami halo advokasia ba edukasaun inkluzivo, identifika eskola sira ne’ebe la-apar ho estandar disabilidade, indentifika labarik ho idade eskola sira ne’ebe ho difisiente, fo apoio ba edukasaun rekorente, fo apoio ba advokasia ba lingua jestual nasional, no advokasia ba inkluizaun sosial,” Felicity esplika.
Diretur ADTL mos esplika katak abarik ne’ebe difisiente ADTL sei koloka ba programa bolsu de mãe ba jerasaun foun no mos fo fundus atu apoio orsamento instituisional ba tinan fiskal durasaun 2024.