Reportajen Filomena da Conceicao
Atleta Timoroan nain 6 ne’ebé maka kompete iha jogu Sammer Games, Berlin Alemaña ohin to’o ikas fali iha Timor-Leste ho Aviaun Airo Dili iha tuku 13:32 otl, no simu direta husi Sekretáriu Estadu Juventude e Desportu (SEJD), Abrão Nokosiku Sadalnha. Atleta nain neen ne’ebé kompete iha jogu Special Olympic, world Sammer Games iha Berlin Alemaña ne’e hetan Medalla 5, iha medallia osan Mean rua, osan metan rua no osan mutin ida.
Xefe Delegasaun Olympic, Amandio Amaral Freitas, hateten, kompetisaun Jogu Special Olympic ne’e kada tinan 4 sempre realiza husi Special Olympic Internasionál sira no tinan ida ne’e hala’o iha Berlin, Alemaña, kompostu husi nasaun 160, no ateleta hamutuk 7.000 mak partisipa iha eventu refere.
“Ha’u hakarak heteten iha world Sammer Games ne’e kada tinan 4 Special Olympic internasionál sira sempre organiza, iha tinan hirak liu ba Timor-Leste sempre partisipa, no iha tinan ida ne’e ita partisipa iha Berlin, no nasaun 160 mak partisipa iha eventu ne’e no 7.000 mak atleta mak partisipa iha eventu refere, nune’e 7.000 atleta ne’e kompete iha modalide hamutuk 26, maibé Timor-Leste tuir nia kbiit no mós nia forsa ita bele partisipa no mós kompete iha modalide atletismu” dehan Xefe Delegasaun Olympic Amandio ba Jornalista sira iha SEJD, Kuarta 28/06.
Nia haktuir, iha modalide Atletik, atleta husi Timor kompete atleta husi rai li’ur iha kategoria hamutuk 771 atleta kompostu husi nasaun hotu, maibé husi kategoria Atletik partisipa iha halai 100 metru, ida ne’e mak Norberta da Cruz hetan medallia osan mean, Aleinde ne’e Atleta Felizarda da Costa mós manan medallia osan mean ka primeiru lugar iha iha jogu ho modalide long jump, kategoria feto ho level C .
“Maibé iha atleta olympic sira mós iha diferensa ho elit atlet, tanba elit atlet fó treinu, sira nia hanoin diak vizaun di’ak, entaun dalaruma halo kompara ho sira ita bele dehan sira di’ak liu, maibé elit Atlet ho atleta Special Olympic ne’e atu ko’alia disiplina sira disiplina liu, tanba wainhira ita orienta sira ida ne’ebé sira kaer ne’e sira sei implementa iha terenu, maibé elit Atlet ita ko’alia sira la tuir, entaun aspeitu sira ne’e kontribui hotu ba sira nia performe,”nia esplika.
Iha fatin hanesan, Sekretáriu Estadu Juventude e Desportu(SEJD), Abrao Nokosiku Sadalnha, hato’o agradese ba atleta Timoroan nain 6 no delegasaun sira tanba bele hetan ona prestasaun di’ak liuliu ba joven difisiésia sira, no oferese tan medallia 5 ba Timor-Leste.
“Ha’u lori governu nia naran, gradese tebes tanba ita boot sira lori ita nia alteta sira ba ho susesu no fila ho susesu, no parabens ba kolega atleta sira tanba bele hetan prestasaun ida ne’e, Special Olympic sira nia prestasaun liuliu ba joven difisiénsia sira nia prestasaun. Ita iha medallia osan mean 2 osan metan ida no osan mutin 2. Ne’e prova mai ita katak sira nia prestasaun nee bele inspira Timoroan hotu, tanba sira lori ita hotu nia orgullu,” nia Agradese.
Entretantu, medallia ne’ebé atleta Timoroan sira hetan iha jogu Special Olympic World Games Berlin, Alemaña 2023 mak hanesan osan mean rua ne’ebé oferese husi atleta Felizarda da Costa no Norberta da Cruz do Santos, osan mutin ida husi Norberta da Cruz do Santos no osan metan rua ne’ebé oferese husi Felizarda da Costa no Oscar Alexandrino.