Reportajen David da Costa
Relasiona Notifikasaun ne’ebé maka Ministériu Públiku liuhosi Prokuradór Jerál Repúblika (PJR) ne’ebé halo notifikasaun bá jornalista Hatutan.com Rogério Pereira Cárceres ho nia Xefe Redasaun Francisco Belo Simões da Costa ne’e, Prezidente Republika preokupa no la konkorda PJR notifika, ba reportajen ka produtu Jornalístiku ne’ebé Media Hatutan.com Publika.
Prezidente Repúblika (PR) José Ramos-Horta, hateten nia la hatene Prokuradór Jerál Repúblika nia servisu barak ka lae, se servisu la barak entaun prontu bele bolu jornalista ida sateia tanba PJR nia servisu la barak.
Maibé Jornalista hakerek buat ruma sala karik, ka mesmu jornalista hakerek sala ne’e tanba nia nakar, hakarak hakerek dunik ne’e mós la’ós krime boot ida, lalika lakon fali tempu ho buat sira ne’e.
“Se lori Hatutan.com ba Tribunál, ne’e di’ak liután tanba publisidade boot loos ba Hatutan.com,” Prezidente Repúblika José Ramos-Horta hateten ho oin hamnasa iha Salaun VIP Aeroportu Internasionál Nicolão Lobato Komoro, Kuarta 28/06.
Xefe Estadu hatutan, ho esforsu atu kriminaliza produtu Jornalístiku ne’ebé Governante ka instituisaun Estadu sira halo bele fó impaktu bá índise liberdade imprensa Timor-Leste nian iha mundu.
Tanba Índise Liberdade Imprensa mundiál tinan 2023 versaun Reportagen sem Fronteira ka Reporters Without Borders (RSF), Timor-Leste tama iha kategoria Liberdade imprensa di’ak, ne’ebé okupa númeru 10 hosi nasaun 180 iha mundu tomak.
“Kriminaliza produtu Jornalístiku ne’e bele fó impaktu ba índise liberdade imprensa Timor-Leste nian iha mundu, bele hatún, tamba ne’e ha’u sei ko’alia ho PJR, ha’u lagosta ho kriminaliza produtu Jornalístiku,” Ramos-Horta afirma.
Xefe Estadu subliña kriminaliza produtu jornalistiku la’ós prioridade boot ida iha Timor-Leste tamba ne’e halo servisu seluk ne’ebé importante bá Nasaun.
Entertantu notifikasaun bá jornalista Hatutan.com Rogério Pereira Cárceres ho nia Xefe Redasaun Francisco Belo Simões da Costa, baze bá despaxu hosi Inspetora Ministériu Públiku, Dra. Zélia Trindade, atu rona deklarasaun relasiona ho produtu Jornalístiku ne’ebé publika iha Hatutan.com, ho títulu Deskonfia, PGR Alfonso Lopez ho Nia Asesór Jurídiku Óscar Tavares Uza Osan Estadu Halo “Viajen Privadu” iha Portugál, ne’ebé maka publika iha loron 19 Maiu 2023.
