Reportajen Zevonia Vieira
Xanana Gusmao hetan posse nu’udar Premeiru Ministru hamutuk ho membru governu sira seluk. Iha Premeiru Ministru nia diskursu ofisial nia hateten katak iha aliansa partidu rua hanesan CNRT no Partidu Demokratiku, ne’ebe ho kompromisu komum atu restaura estadu de direitu demokrátiku.
nia dehan katak iha sentimentu moruk, tanba fo prioridade hodi bolu antigu membru husi IV n V governu, “hau bele komprende dezapontamentu husi sosiedade, konaba laiha kuadru polítiku no tékniku foun. Hau hakarak esplika katak nesesáriu ka presiza tebes bolu fali ema sia ne’ebe koñese ona sistema, hodi nune esfosu ne’ebe sei halo atu hatur fali legalidade, esforsu sira ne’e bele lori rezultadu konkretu no lalais”.
Xanana mos deklara konaba númeru neebe boot liu husi membru governu, nia dehan la konsege evita halibur timoroan sira ne’e hotu, tanba IX governu kompromete an atu halo difernca iha planu, iha asaun no iha jestaun ba responsabilidade.
“Halo koresaun ne’ebe nesesáriu, halo diak liu, ida nee mak sai nudar plataforma komum de entendimentu atu forma governu foun. Pratika governativa husi governu sei tuir prinsípiu boa governasaun nian, prinsípiu inkluzaun no tuir prinsípiu katak tenke obedese ba lei” dehan Xanana iha tomada de posse ba IX governu iha palacio prezidensiál, 01/07/2023.
Tuir Primeiru Ministru nia diskursu hateten vizaun no misaun ba IX governu mak nasaun ida ne’ebe nia sosiedade sai prospera no saudavel, edukadu,kualifikadu, inovadora no dinámika, ho asesu jeneralizado ba bens no servisu ne’ebe esensiais no produs empregu iha setór produtivu hotu, hodi hatán ba situasaun ekonomia emerjente.
Nia konklui katak objetivu ba estrutura IX governu mak fo kada membru governu misaun ida tu kumre, iha diferentes ba areas no setór sira, hodi bele dudu asaun desisiva, iha períodu ida ne’ebe krusiál ba mudansa, hodi mos tau matan ba preparasaun, iha munisípiu idak-idak, ba pesoál tékniku, ne’ebe presiza ba prosesu desentralizasaun podér.
“Povu ho nia direitu legitmu fo lolos mensajen ida ne’e, ita tenke salva ita nia estadu de dirietu demokrátiku, hodi bele lao ho otimizmu no konfiansa tuir dalan progresu”. Dehan Xanana
Total membru governu ne’ebe hamutuk 47 ne’ebe lidera husi Premeiru Minsitru Xanana Gusmao, ne’ebe kompostu mane nain 40 no feto nain 7