Reportajen Umbelina dos Reis
Sekretáriu Estadu Komunikasaun Sosial (SEKOMS) ba governasaun da-IX nian, Expeditu Dias Ximenes iha loron tomada de posse ba jornalista sira, hateten katak durante 120 dias dahuluk sei tau atensaun no fo prioridade ba hadi’a kualidade produtu jornalístiku nian, oinsá hadi’a média konvensionál no plataforma online no mos sei haree ba jornalista sira nia subsídiu hodi hasa’e bem-estar journalista nian.
Sekretáriu Estadu Expedito hateten, durante 120 dias fo prioridade oinsá tau matan hodi hadi’a produtu jornalístiku iha nasaun Timor-Leste, hodi atensaun másimu ba média konvensional no plataforma online, liu-liu média estatál RTTL no TATOLI, atu servisu hodi halakon informasaun hoax ka lia-falsu, nune’e hametin no haburas kualidade jornalistiku iha nasaun Timor-Leste.
“Durante mandatu sei tau atensaun ba média sira, hodi hadi’a kualidade di’ak liu tan produtu jornalístiku nian, nune’e moos tau atensaun ba jornalista sira oinsá bele hetan subsídiu, tanba oras ne’e da-dauk situasaun ekonomia média sira nian la permite, nune’e direita ka indireitamente hasa’e bem-estar jornalista sira nian, depois subsídiu nia formatu sei ko’alia maibé objetivu ne’e oinsá fo apoiu ba média hanesan RTTL ho Tatoli, mezmu hetan ona Orsamentu Jeral Estadu (OJE) nian, maibé média konvensional no privadu online, ne’ebé rejista iha Konsellu Imprensa (KI), presiza mos tau atensaun hodi nune’e bele foti produtu jornalístiku kualidade aas liu tan, ida ne’e mak sei halo durante 120 dias nia laran.” dehan Expedito ba jornalista sira, hafoin simu pose iha Palásiu Prezidensial, Ai-tarak laran, Sabado, 01/07.
Nia dehan, sei tur hamutuk ho orgaun komunikasaun sosial sira, hodi kria planu ida ne’ebé di’ak ba dezenvolvimentu área komunikasaun sosial nian, nune tau prioridade ba subsídiu média nian, tanba durante ne’e observa katak iha buat rua ne’ebé presiza tau atensaun mak kontinua habelar informasaun kredivel ka hafoti produtu jornalístiku nian, hodi depende bem-estar ba jornalista nian, nune’e kontinua fo formasaun ba jornalista sira iha faze por faze.
Nia informa, Centro de Formação Técnica em Comunicação (CEFTEC), ne’e bele muda ba institutu públiku hodi sai fatin espesiál ba jornalista sira, nune’e kontinua tuir formasaun hanesan iha nivel báziku, médiu no avansadu.
