Reportajen David da Costa
Relasiona ho Estrada iha Munisípiu Ermera liga ba iha postu lima hanesan Atsabe, Letefoho, Ermera Vila, Hatulia A no Hatulia B, ne’ebéé maka foin lalais udan boot halo estrada kotu no monu arbiru hotu, Ministru Planu Ordenamentu (MPO) Konsidera halo konstrusaun ba estrada ne’e laiha estudu ida ne’ebé maka kle’an.
Ministru Planu Ordenamentu (MPO), José Maria dos Reis hateten estrada ne’ebéé maka monu hotu iha Munsipiu Eremera ne’e MPO simu ona informasaun, no ko’alia ona ho Ministru Obras Publika (MOP) atu foti medias lalais, hodi responde ba iha estrada ne’ebé maka monu hotu iha Munisípiu Ermera , tanba konstrusaun ba estrada sira ne’e laiha estudu kle’an, nune’e la dura to’o tinan lima komesa monu.
“Husi buat sira ne’e maka hatudu ba ita katak ita nia estudu ba iha estrada ne’e la kle’an, entaun estrada tuir lolos ne’e bele dura tinan 5, 10 ka 15 anos maibé menus husi tinan 5 estrada monu fali ona, ne’e hatudu momos ba ita estudu ne’e la klean,” dehan José Maria dos Reis, ba jornalista sira banhira remat enkontru ho Primeiru Ministru Taur Matan Ruak iha Palásiu Governu, Segunda 3/04.
Nune’e nia dehan governu halo semináriu no halo reflesaun ida konaba konstrusaun infraestrutura dentru de 20 anos ne’e, “para bele haree loos no sala ita nian iha ne’ebé, ita tenke hadia kestaun ida ne’e, lae ita kontinua repete sala ida ne’e”.
Iha Sabadu 1 Abríl ne’e, Portavos husi Movimentu foin-sa’e Atsabe (MOFA), Egitro dos Santos, liuhusi konferensia imprensa hato’o sira nia ezijénsia ba governu, relasiona ho problema infraestrutura hanesan. estrada ne’ebé kotu iha Munisipiu Ermera, kompostu husi Postu lima maka Atsabe, Letefoho, Ermera Vila, Hatulia A no Hatulia B. ne’ebé hetan estragus husi mota-boot ne’ebé akontese iha fulan Fevereiru to’o mai fulan ida ne’e sobu hotu ,dalan estratéjiku sira ne’ebe atu fasilita komunidade sira atu asesu ba merkadu, hodi fa’an sira nia produtu no sosa produtu seluk ne’ebé sira laiha.
Tanba Ohin-loron, ema hotu koñese katak postu-Atsabe povu maioria kontinua moris ho negósiu ka fila-liman, estrada sai hanesan meius ida ne’ebé prinsipál ba komunidade sira, atu hala’o sira-nia atividade. Ba akadémiku intelektuál tomak ne’ebé hola papél importante hanesán matan, tilun no ibun ba sosiedade, tenke brani no kestiona beibeik ba desizaun hotu ne’ebé sempre haterus klase ki’ik no ki’ak sira.
“Mai ita hamutuk lalika vota iha eleisaun parlamentar ne’ebe monu iha 21 fulan Maiu 2023, kuandu ita nafatin terus no elit-polítika sira ksolok iha ita-nia terus leten”, prota voz ne’e hateten bainhira hato’o ezijénsia estrada Ermera nian aat, iha Jardín 5 de Maiu Kolmera, Sabadu 01/04,
Tanba inan ho aman-sira tenke abandona sira-nia atividade tanba estrada kotu, inan ho aman abandona sira-nia atividade signifika la’ os problema ida de’it maka iha maibé problema barak maka sei mosu iha situasaun ida ne’e. Se sira la normaliza sira organiza malu la vota iha eleisaun nee mai, tanba partidu sira mai ba interese kabun tasak nian, sira ba haree deit ema sira neebe iha poder politika.
“Karik sira la rezolve urjente ami sei la partisipa iha eleisaun, ami sei organiza povu Ermera atu la vota iha partidu sira neebe mai atu hakonu deit sira nia interese no haboot deit sira nia an”, nia kritika.
Nia haktuir, problema estrada ba Ermera liu-liu iha postu administrativu Atsabe, ne’e la’os buat foun maibé ne’e buat ida tuan. hahu husi Timór-Leste hetan independénsia ate-adata, governasaun sempre troka husi periodu ida ba periodu seluk. partisipa masimu husi povu inklui sosiedade Ermera, nafatin fó fiar ba partidu politiku, maibe governu ne’ebé sira fo fiar liu husi partidu la iha ida maka toka ba problema ne’ebé munisípiu Ermera hasoru.
