Reportajen David da Costa
Governu iha ona planu atu muda sidade administrativa Governu nian iha kapitál Dili ba iha Postu Administrativa Metinaru Munsipiu Dili, tanba haree Sidade Dili kloot ba daudauk ona, maibé atu muda Governu sei halo estudu viabilidade ida hafoin muda Sidade Administrativa foun ne’e ba iha Metinaru.
Ministru Planeamentu Ordensaun (MPO), José Maria dos Reis, dehan, atu muda Sidade Adminisrativa foun iha Metinaro ne’e presiza iha estudu ida ba iha Sidade Administrativa, ema balun ko’alia dehan sidade Dili atu muda, mas laos sidade Dili maka atu muda, maibé atu konsentra edifisiu estadu nia ba iha Metinaro ida ne’e maka planu ne’ebé maka Governu iha.
“Prosesu hotu-hotu hateten katak ami hatama rezolusaun ne’ebé-ke aprova ona, i prosesu ida ne’e iha hela grande proseitu atu bele diskute atu bele halo termus referensia ida, para atu bele prosesa ba iha SNA para ita bele hetan konsultór ruma ba iha estudu ida ne’e. Tanba rezolusaun ne’e aprova ona, agora hein prosesu tekniku balun, ita sei haree no halo estudu biabilidade no mai iha estudu detaladu depois maka haree ida ne’e loos ona maka ita foin alkoa osan hira,” hateten Ministru Planeamentu Ordensaun (MPO), José Maria dos Reis, ba jornalista sira hafoin remata ekontru ho PM Taur Matan Ruak iha Palásiu Governu, Segunda 3/04.
Nia haktuir, muda edifisiu ne’e tanba primeiru haree Dili labele ona oinsa maka atu ordena Dili, atu ordena Dili tanba ne’e atu halo edifisiu estadu nia hamutuk ho populasaun nia uma ne’e haree ladun diak, tanba ne’e maka governu hanoin katak diak liu dudu sai sidade administrative iha ne’ebá, mas depende estudu, depois estudu biabilidade mai iha estudu detailadu mas ida ne’e laos lori tempu badak ne’e lori tinan oin mai para bele halo.
“Ne’e maka ohin hau dehan, tenke liberta uluk rai, prosesu ne’e lao ona, ami identifika rai iha fatin rua ida entre FFDTL nia ho Simiteriu ne’e, ida seluk ne’e maka mai iha ponte nian ne’e, i prosesu libertasaun ne’e hotu tiha, ami tenta lao estudu lebantamentu ida para ita atu hatene loloos, konserteza sei lori tempu ida naruk para atu halo iha ne’ebá, laos ohin, ohin kedas, ita atu sobu ohin, ohin ita sobu ona ,mas atu konstru labele hanoin dehan aban hotu kedas, mas epresisu iha planu no mehi ba oin,” nia esplika.
Antes iha dia 15 fevereiru 2023, Ministru Prezidénsia Konsellu Ministru, Fidélis Magalhães, hateten, Konsellu Ministru rona no apresia aprezentasaun hosi Ministru Planu no Ordenamentu, José Maria dos Reis kona-ba opsaun sira ba lokalizasaun sidade administrativa foun. Ne’ebé, futuru mai instalasaun ba sidade administrativa Governu iha vizaun ida katak sei bele muda fali ba iha parte Leste hanesan Metinaro. Maibé, asuntu ne’e iha hela prosesu identifikasaun fatin, halo levantamentu hodi hili lokál ida ne’ebé apropriadu.
Nia haktuir, Iha aprezentasaun ne’e ko’alia mós opsaun sira lejizlativa nian ne’ebé mak tenke halo para konkretiza objetivu ida ne’e. Razaun ida hodi Governu muda sidade Dili tanba kapitál kloot ba daudaun ho aumentu populasaun ne’ebé mak maka’as , nune’e fó biban hodi hadi’ak fali sidade.
Tuir relatóriu preliminár Sensu Populasaun no Uma-Kain 2022, rejista abitante iha Dili hamutuk 324.269.
