Reportajen Silvino Freitas
Embaixada Japaun realiza Resepsaun enkontru ho Alumni Japaun nian no entudante kandidatu foun ba bolsu estudu Japaun nian, nunee estudu iha nivel ensinu superior maka sai hanesan instrumentu importante ba prosesu harii nasaun.
Embaixador Japan iha Timor-Leste Yamamoto Yasushi dehan, sente kontente tanba estudante timoroan liu na’in 130 mak hala’o ona sira nia estudu iha nivel ensinu superiór nian iha universidade Japaun nian, neebe inklui destinatáriu na’in 36 hosi Bolsa Estudu MEXT, Ministériu Edukasaun, Siénsia no Teknolojia Japaun nian, estudante na’in 17 iha Akademia Defeza Nasionál Japaun nian, partisipante na’in 40 iha programa formasaun JICA nian ba tempu naruk, no bolseiru na’in 35 tuir inisiativa JDS nian, númeru partisipante sira nian kontinua aumenta tinan-tinan.
“Tinan ida-ne’e, estudante timoroan na’in haat sei hahú sira nia estudu iha universidade Japaun nian, na’in rua sei tama iha programa Bolsa Estudu MEXT, enkuantu na’in rua seluk sei tama iha Akademia Defeza Nasionál” dehan Embaixador Japan iha timor leste Yamamoto Yasushi iha ambitu resepsaun enkontru alumni japaun, (24/02).
Nia dehan tan, konvensidu tebes katak konfiansa interpesoál sai hanesan fatuk-inan ba relasaun bilaterál sira nune’e espera katak ensinu superiór maka instrumentál iha prosesu harii nasaun, hafoin nia hetan benefisiu pesoál hosi estuda iha rai-li’ur iha Universidade Harvard tinan 32 liubá-esperiénsia formativa ida ne’ebé kontinua influensia nia to’o ohin loron nia rekoñese valór kle’an hosi espozisaun internasionál.
“Ha’u iha konfiansa katak ita-boot sira-nia esperiénsia akadémika iha Japaun sei hariku tebes ita-boot sira-nia futuru pesoál no Timor-Leste nian” dehan Embaixador Japan iha timor leste Yamamoto Yasushi.
Entretantu estudante Jania Martins hanesan kandidatu foun ba estudu Mestradu nian iha Kyoto Japaun dehan, sente kontente tebes atu hetan oportunidade ba estuda iha japaun iha area ambiente nian, tuir nia area ambiente relevante tebes ba nia servisu iha area kafe nian nunee bele dezenvolve no esplora seitor kafe iha timor leste, nunee bainhira remata estudu iha japaun sei fila kontribui diak liu tan ba dezenvolvimentu nasaun nian.
“Hau sei ba estuda iha area ambiente global nian ho epseransa bainhira remata estudu fila mai Timor hakarak dezenvolve Timor, tanba area ambiental mai hau importante tebes hau foti area ambiente tanba agora dadaun hau nia servisu neebe hau halo relasiona uituan ho area kafe nian nunee hau nia peskiza neebe hau halo nee iha area ambiente liuliu foka ba area kafe nian” konklui Jania iha Embaixada japaun praia dos coqueiros.
