Reportajen Umbelina dos Reis
Ministru Justisa ba governasaun da-IX iha nia kompromisu atu tau prioridade ba asuntu pasaporte no Billete Identidade ne’ebe to’o ohin loron komunidade preokupa.
Iha loron tomada de posse ba jornalista sira, Ministru Justisa, Amandio de Sá Benevídes hateten iha mandatu ninin sei tau prioridade ba Timor-oan sira ne’ebé halerik hela atu halo kaderneta Pasaporte no Billeti Identidade (BI), tanba Timor oan balun durante ne’e atu ba eskola iha rai li’ur, balun hakarak ba servisu iha rai li’ur no balun ba halo tratamentu saúde iha li’ur maibé kaderneta pasaporte laiha, nune’e hahu loron Segunda-feira (03/07) Ministériu Justisa sei esforsu másimu hodi aselera povu nia preokupasaun hirak ne’e.
Ministru Amandio hateten iha mandatu da-IX sei hala’o misaun no vizaun hodi hadi’a problema hirak ne’ebé akontese da-dauk iha área justisa nian, nune’e Ministru Justisa sei koordena ho diresaun ne’ebé tutela iha Ministériu Justisa, sei esforsu másimu hodi rezolve lalais problema hirak ne’e, nune’e iha tempu adekuadu nia laran Timoroan hetan fila-fali billete identidade no kaderneta passporte Timor-Leste nian.
Governante ne’e husu ba povu tomak tenki hein, tanba governu anterior ne’ebé mak halo kaderneta pasaporte no billete identidade sei tur hamutuk ho kompañia ne’ebé mak halo kaderneta pasaporte nian, nune’e kontinua tuir duni lei no regra.
Nia informa, governu foun nia mandatu prioridade liu mak tenke responde lalais povu nia preokupasaun ba halo pasaporte no Bilete Identidade (BI) nian, nune’e labarik sira ne’ebé eskola iha rai li’ur ka ema balun ne’ebé halo tratamentu saúde iha li’ur inklui Timor oan ne’ebé atu ba servisu iha rai li’ur karik bele asesu lalais ba pasaporte.
