Reportajen Agustina Soares
Ponte mota Aba-tú iha Munisípiu Manufahi kotu, tanba impaktu husi udan no inundasaun, halo movimentu ba transporte labele asesu, nune’e joven sira hela iha fatin refere esforsu an, kria grupu ho naran Tane Liman, hodi tulun maluk motorizada sira ne’ebe tenta atu liu fatin ne’e.
Cesaltino d Costa Belo nu’udar foinsa’e husi suku Letefoho, postu administrativu Same, hateten, impaktu husi ponte ne’ebe kotu, ami foinsa’e sira kria gupu ho naran grupu Tane Liman, hodi tulun maluk sira hulan sira nia motor, husi mota sorin hodi hakat liu.
“Impaktu husi udan ne’ebe bo’ot hodi rezulta ponte aba-tu kotu, kria servisu bo’ot ba foin sae iha Letefoho, tanba sempre ajuda komunidade barak ne’ebe hasoru laloran udan nain,” informa foin sae Cesaltino ba jornalista husi telefone, Kuarta 05/07.
Atividade ne’e fo mos benefísiu ba grupu ne’e, tanba hetan selu hosi motor nain sira ne’ebe hakarak hakat liu mota ne’e.
“Ami la husu karun, ami husu motór ki’ik ka bo’ot ho osan $5.00, no osan ne’ebé ami halibur, ami sei rai iha ami nia grupu, hodi halo atividade ruma ne’ebé bele fó benefísiu ba ami nia grupu”, tenik Cesaltino
Entretantu impaktu udan bo’ot iha munisípiu Manufahi, fo impaktu boot ba komunidade sira hodi halo movimentu, tanba ligasaun transporte diresaun Same-Dili paradu totla, tanba estrada kotu iha parte Liholo no parte tasi mos kotu.