Reportajen Joanina Casamiro
Lusia Xavier Araujo, idade 39, husi Aldeia Bandeira-Hun, Suku Liurai, Postu Administrativu Aileu-Vila, Munisipiu Aileu ho nível edukasaun analfabetizmu ho nia la’en Domingos Mau-Misa, hala’o atividade kuda modo hodi selu oan sira nia eskola no sustenta família uma laran.
Nune’e liu hosi World Vision nia programa kuda modo bele muda Lusia nia moris iha família, tanba hetan tékniku foun konabá kuda modo nian nomos suporta sira seluk tan. Nia konta, uluk liu wainhira seidauk tuir treinamentu hosi World Vision nia programa kuda modo, entaun sira uza métodu kari de’it hafoin modo boot mak fokit hodi ba kuda tanba sira hela iha área rural menus tebes informasaun.
Tan ne’e liu hosi organizasaun Internasional World Vision iha Timor-Leste ne’ebé organiza ona komunidade to’os na’in suku Liurai servisu halo grupu inklui Lusia Xavier Araujo, sira bele hatene ona tékniku kuda modo ne’ebé di’ak.
Lusia forma ona família, iha oan na’in 6 kompostu husi feto 1 mane 5. Nia oan ida ikun ne’e nu’udar ema ho defisiénsia, nia oan mane boot agora iha Semináriu. Nia dehan, osan ne’ebé atu selu oan sira nia eskola depende de’it ba to’os nu’udar ema agrikultór la iha tan servisu seluk.
“Ami hanesan komunidade sente kontente tebes ho inisiativa hosi World Vision nia programa kuda modo tanba bele mai fahe iha ami nia suku ida ne’e, bele fo benefísiu ba ami nia moris,” hatete to’os na’in Lusia ba Neon Metin, iha Suku Liurai, Sexta-feira, 21/07.
Nia dehan wainhira World Vision nia programa kuda modo, seidauk tama sira sente susar tebes entre tinan 2007 to’o 2009, sira kuda modo maibé ladun moris ho di’ak, maibé hafoin apoiu sira sente di’ak oi-tuan ona.
“Modo ne’ebé ami kuda oferese de’it hosi World Vision, sira konta iha grupu ida ema na’in hira mak hamutuk, 10 ka 20 entaun sira fo fini tuir ema iha grupu nia laran, primeiru sira fo de’it depois sira dehan imi kuda ba depois imi hetan ona imi nia osan rasik ba, depois mak imi hola rasik fini ne’ebé ho kualidade, ida mutin ne’e $18.00, ida fali metan ne’e $21.00,” nia dehan.
Alende ne’e mós nia informa modo ne’ebé ho kualidade di’ak sira bele kolleta kantredu haat ka lima, wainhira sira kolleta hotu sira kontaktu ba iha loja Seara mai tentu modo kualidade di’ak i loron ida sira bele hetan $100 resin.