Reportajen Joselina dos Santos
Komandu Polísia Nasional Timor-Leste (PNTL), Munispiu Díli kaptura ona joven na’in sia ne’ebe dekonfia na’ok sasan iha Díli laran, hodi halo komunidade ta’uk no trauma. Alein de mos ne’e, PNTL prende sasan ne’ebe sira na’ok hanesan mobile 5 no motor 5, ho ida ne’e Komandu PNTL Munispiu Díli sei kontinua buka tuir suspeitu balun ne’ebe seidauk identifika.
“Ita hotu akompaña no hatene kona-ba kazu ne’ebe akontese na’ok sasan iha fatin-fatin Dili laran, hahú husi loron 1 to’o 25 fulan jullu 2023, ho idan ne’e Komandu PNTL Munisipiu Díli halo operasaun no jestaun operasaun konjuntu hodi halo identifikasaun no kaptura suspeitu na’in sia ne’ebe detein ona iha sela komandu munisipiu Díli”, dehan Komandu PNTL Munisipiu Díli Superintendente Xefe Polisia, Orlando Gomes, liu hosi Konferénsia Imprensa iha Kaikoli, 27/07.
Liu hosi Konferénsia imprensa ne’e, Komandu PNTL Munisipiu Díli hatete, sira sei kontinua halo operasaun atu bele identifika suspeitu deskoñesidu seluk ne’ebe seidauk kaptura atu kontinua halo investigasaun.
“Suspeitu sira ne’e mai husi grupu ketak-ketak, maibé ita bele dehan sira ne’e organizadu atu asaltu iha Dili laran iha fatin-fatin, tanba akontesimentu sira ne’e, ema hanesan mak halo asaltu ba vitima na’in ualu ne’ebe dadaun ne’e aprezenta keixa tuir prosesu.”
Nia salenta, sira nia modus na’ok ne’e sira uza meius oin-oin hodi besik ba vitima sira-nia motorizada, tanba telefone vitima sira tau iha motor nia bolsu entaun suspeitu balun tenta besik vitima sira no balun tenta na’ok vitima sira-nia telefone hodi halai, ida ne’e mak durante sira halo hodi na’ok iha Díli laran.
“Maibe progresu ne’ebe ita hetan sei la nonok tanba kalan loron ita kontinua halo operasaun ba fatin ne’ebe sira hela ba. Iha operasaun ne’e mos ami prende ona motorizada hamutuk lima, motor ho marka Scoopy ida ho motor Beat haat nomos telemovel lima, kazu ida ne’e submete ona ba prosesu investigasaun.”
Komandu PNTL Munisipiu Dili sei kontinua halo operasaun atu bele identifika tan sira seluk tuir sira nia deklarasaun ne’ebe fó. Tanba ne’e sei buka tuir to’o kaptura hotu tanba Komandu PNTL hatene ona sira nia fatin, nune’e sei la tolera sira atu na’ok komunidade sira nia sasan ho halo ema sai trauma ba sira nia hahalok rasik.