Reportajen Joselina dos Santos
Autoridade Protesaun Civil (APC) hamutuk ho parseiru internasional hanesan BMKG (Badan Meteorologi, Klimatologi, dan Geofisika) Indonesia no UNESCO (The United Nations Educational, Scientific and Cultural Organization) sei tun ba tereinu hodi servisu hamutuk ho autoridade komunitáriu sira hodi halo peskiza kle’an ba akontesimentu Tsunami iha tinan 1995, iha Timor-Leste. Objetivu husi peskiza ne’e atu identifika testemuña prinsipal sira ne’ebe sai vitima ba akontesimentu Tsunami, alein de mos fó hanoin ba komunidade sira atu prevene aan no kuidadu nafatin.
Hafoin Workshop, Komadante Operasionál Nasional Autoridade Protesaun Sivil, Superintendente Asistente Polísia Nuno Romaldo Gomes hatete, ohin iha atividade importante ida kona-ba atu reforsa no hakbiit kapasidade Protesaun Sivil liuhosi apoiu organizasaun BMKG no UNESCO nomos UNDP (The United Nations Development Programme) Sira fó workshop ida ne’e objetivu atu kordena ho sira hodi halo peskiza ida atu hatene kona-ba informasaun sira kona-ba Tsunami ne’ebe durante ne’e akontese iha Timor-Leste.
“Atividade durante loron tolu ne’e hahu seminariu no ida seluk ekipa BMKG, APC no UNESCO sei tun ba tereinu halo kordenasaun ho autoridade lokal sira atu buka identifika ba ita nia ema sira ne’ebe sai vitima ba akontesiementu Tsunami iha Kampu Marinir iha tinan 1995”, dehan, Komadante Operasionál Nasional Autoridade Protesaun Sivil, Superintendente Asistente Polísia Nuno Romaldo Gomes iha APC Kaikoli, 26/07.
Nia dehan, iha momentu ne’eba komunidade balun mate no estraga sasan barak, entaun ho istória ne’e sira halo peskiza atu tau iha dokumentu hodi halo livru ida hodi sai referensia ida atu hakbiit sira nia kapasidade iha UNESCO nomos hakbiit APC nia kapasidade hodi bele halo sensibilizasaun no fó hatene ba komunidade sira atu labele hela iha fatin ne’ebe identifika katak fatin refere perna akontese Tsunami hodi halo ema barak mate no estraga sasan barak.
“Iha tinan 2022 ita ekipa hahu halo peskiza provijoriamente identifika ema sanulu-resin mak lakon vida ba iha akontesimentu Tsunami ne’e rasik, inklui mos uma sira ne’ebe hetan estragus. Entaun dadaun ne’e sira halo peskiza atu hetan informasaun kordena ho xefi suku sira hodi identifika testamuña prinsipal sira atu bele hetan informasaun klaru”, nia informa.
Nune’e nia espera katak iha futuru dokumentus sira ne’e bele sai livru ida hanesan mos materia ida atu fó hanorin estudante sira katak iha Timor-Leste perna iha akontesimentu Tsunami. Nune’e APC sei fó atensaun ba komunidade sira kona-ba fatin sira ne’ebe akontese Tsunami no husu komunidade sira buka fatin seguru atu bele prevene-an.
